"Uzchess Cup". 4-турдан сўнг "Masters" ва "Futures" гуруҳларида шахматчиларимиз якка пешқадам!

Мукофот жамғармаси 166 000 АҚШ долларини ташкил этувчи мусобақада бугун 4-тур учрашувлари ўтказилди. Қизиғи, турнирнинг "Masters" ва "Futures" гуруҳларида ўзбекистонлик шахматчилар якка пешқадам бўлиб олишди. 

Бугун истеъдодли гроссмейстеримиз Нодирбек Якуббоев (2634) Эроннинг биринчи рақамли шахматчиси, "Uzchess Cup" турнирида учинчи рақам остида таснифланган Парҳам Мақсудлуни таслим этди ва "Masters" гуруҳида 3 очко билан якка пешқадам бўлиб олди. Хитойлик Ю Янг Йи (2715) ҳамда бу турда Нодирбек Абдусатторовдан устун келган Жавоҳир Синдаров (2668) 2,5 очко билан иккинчи ва учинчи ўринларни банд этишган. Риччард Раппорт, Нодирбек Абдусатторов ва Алексей Сарана ҳисобида 2 очкодан бор. 

"Challengers" гуруҳида 4-турдан сўнг сербиялик Александар Инджич 3 очко билан якка карвонбошилик қиляпти. Ҳамюртимиз Шамсиддин Воҳидов бу турда туркиялик Мустафа Йилмаз билан дуранг ўйнади. У 2,5 очко билан иккинчи ўринни банд этган. Жаҳонгир Воҳидов 2 очко билан қўшимча кўрсаткичларга кўра кучли учликка якун ясаб берган. Мустафо Йилмаз, Максим Матлаков, Александр Донченко ва Абҳижит Гупта ҳисобида ҳам 2 тадан очко бор. 

Ва ниҳоят, "Futures" гуруҳида 4-турдан сўнг ўзбекистонлик уч нафар шахматчи кучли учликдан жой олиб турибди. Кетма-кет учинчи ғалабасини қўлга киритган Муҳаммадзоҳид Суяров (2430) 3,5 очко билан якка пешқадамликни қўлга олди. Муҳиддин Мадаминов ва Саидакбар Сайдалиев ҳисобида 2,5 тадан очко бор. Бугун Ҳумоюн Бегмуратовни таслим этган эронлик Бардия Данешвар ҳам ўз очколарини 2,5 тага етказиб олди.