Вьетнамда ҳамюртимиз чемпионлик камари учун рингга чиқади, бугун у тарозидан ўтди ФОТОГАЛЕРЕЯ

Жами 8 та жанг ўтказилувчи бокс оқшомига District 7 Arena мезбонлик қилади. Ана шу 8 та жангнинг 3 таси бевосита ўзбекистонлик боксчилар иштирокида кечади.

Эътиборлиси, оқшомнинг марказий жанги ҳам айнан ҳамюртимиз иштирокида бўлиб ўтади. Тажрибали Олимжон Назаров вакант бўлиб қолган WBO Oriental чемпионлик камари учун филиппинлик Иван Сорианога қарши рингга кўтарилади. 

Маълумот учун, Олимжон Назаров проф рингда 23 та жанг ўтказиб, 18 ғалабага эришган. Ҳисобида 11 та нокаут бор. Бешта жангда мағлубият аламини тотиб кўрган. Сориано ҳам Назаров сингари 23 та жанг ўтказган. Ана шу жангларнинг 20 тасида ғалаба қозонган, 20 таси нокаут билан. Ҳисобида 2 мағлубият ва бир дуранг бор. 

Шунингдек, ушбу бокс кечасида ҳамюртларимиздан Шохруҳ Ашуров кореялик Канг Сеон Жонгга, Равшанбек Шерматов эса хитойлик Бинг Ченг Зоуга қарши рингга чиқади. Бугун боксчилар тарозидан ўтиш маросимида иштирок этишди ва белгиланган вазн меъёрини бажаришди.