VI Ислом бирдамлиги ўйинлари. Эрон медаллар жамғариш бўйича бизга етиб олди

Медаллар жамғариш бўйича Туркия терма жамоаси катта фарқ билан пешқадамлик қилмоқда. Уларга ҳеч ким ета олмаслиги ҳам ойдинлашди. Турк қардошларимиз 58 та олтин, 31 та кумуш, 23 та бронза, жами 112 та медални қўлга киритиб улгуришди. 

Иккинчи ўрин учун кураш кескинлашди. Эрон делегацияси 16-олтин медалини қўлга киритиб, терма жамоамизга етиб олди. Агар кеча таэквондочимиз Озода Собиржонова финалда эронлик рақибасига ютқазганида, форслар медаллар жамғариш жадвалида бизни ортда қолдириб 2-ўринга кўтарилиб олган бўлар эдилар. Эрон 16 та олтин, 15 та кумуш, 21 та бронза медали билан 3-ўринни эгаллаб турибди.      

Ўзбекистон спорт делегацияси ҳам Эронда бўлгани сингари жами 52 та медаль бор. Шундан 16 таси олтин, 19 таси кумуш, 17 таси бронза медалларидир. Кумуш медаллар кўплиги ҳисобига 2-ўринни сақлаб қолдик. Кучли бешликдан Миср ва Қозоғистон терма жамоалари жой олган.