Волкан Оздемирнинг навбатдаги жанги тасдиқланди

Богдан Гусковнинг UFC`даги илк рақиби 22 ноябрь куни Қатар пойтахти Доҳа шаҳрида ўтказиладиган турнирда Алонзо Менифилдга қарши октагонга чиқади. 

Ярим оғир вазн тоифасида чемпионлик камари учун собиқ даъвогар Волкан Оздемир сўнгги жангини ўтган йилнинг ноябрь ойида ўтказиб, уч раунд якунига кўра бир овоздан Карлос Ульбергга имкониятни бой берганди. Бунгача 36 ёшли Волкан ҳамюртимиз Богдан Гусковни бўғиш усули эвазига мағлуб этганди. Жонни Уокерни эса нокаутга учратган эди. 

Америкалик 37 ёшли Алонзо Менифилд икки ғалабадан иборат серия билан келмоқда. У Жулиус Уокер устидан ҳакамларнинг айри қарори билан устун келган, Омар Сини эса якдил қарори эвазига мағлуб этганди. 

Айни дамда Волкан Оздемир UFC ярим оғир вазн тоифаси рейтингида тўққизинчи, Алонзо Менифилд эса ўн тўртинчи поғонани эгаллаб турибди.