18 окт 08:01
Янгиликлар

Теннис

VTB Kremlin Cup. Абдураимова бугун ярим финалда ўйнайди

Россия Федерацияси пойтахти Москва шаҳрида теннис бўйича аёллар ўртасидаги VTB Kremlin Cup мусобақаси давом этмоқда.

Турнирнинг яккалик саралаш баҳсларида мағлубиятга учраган ҳамюртимиз Нигина Абдураимова энди бор эътиборини жуфтликдаги иштирокига қаратмоқда. Мамлакатимизнинг иккинчи ракеткаси жуфтликда россиялик 18 ёшли Анна Калинская билан тандем ҳосил қилган.

Улар кеча 1 соату 16 дақиқа давом этган чорак финал учрашувида Евгения Родина ҳамда Айла Томлянович жуфтлигини 4:6, 6:1, катта тай-брекда 10:6 ҳисобида мағлуб этишди. Бугун Нигина ва Анна ярим финалда хорватиялик Дарья Юрак ҳамда руминиялик Ралука-Йоана Олару жуфтлигига қарши кортга чиқишади.