Халқаро стол тенниси федерацияси билан ҳамкорликни янада кучайтириш масалалари муҳокама қилинди

Ушбу нуфузли мусобақанинг фахрий меҳмонлари — Халқаро стол тенниси федерацияси биринчи вице-президенти, Осиё стол тенниси иттифоқи президенти Ҳалил Ал Моҳаннади, Осиё стол тенниси иттифоқи Бош директори Насиб Ҳассан Ал Факиҳ ҳамда Осиё стол тенниси академияси директори Аҳмед Ал Моҳаннади Ўзбекистон Миллий Олимпия қўмитасига ташриф буюришди.

Меҳмонларни МОҚ раиси биринчи ўринбосари Отабек Умаров самимий кутиб олди. Учрашув давомида мамлакатимизда стол тенниси ривожини янги босқичга олиб чиқиш, ўзаро ҳамкорликни янада мустаҳкамлаш, маҳаллий мутахассисларнинг малакасини ошириш ва етук мураббийлар ва халқаро тоифадаги ҳакамларни тайёрлаш масалалари муҳокама қилинди.

Шунингдек, юртимизда халқаро турнирлар сонини ошириш, терма жамоаларимизга хорижлик мутахассисларни жалб этиш, спортнинг ушбу йўналишини янада оммавийлаштириш каби йўналишларда ҳам фикр алмашилди.