Холли Холм WBA чемпионлик камари учун жанг қилади

У Стефани Ханга қарши енгил вазн тоифасидаги WBA чемпионлик камари учун рингга кўтарилади. Бу икки америкаликнинг чемпионлик жанги Аманда Серрано ва Эрика Круз ўртасидаги бокс оқшомининг иккинчи муҳим воқеаси бўлади.

Бу ҳақда Most Valuable Promotions промоутерлик компанияси расман маълум қилди.

Маълумот учун, 44 ёшли Холли Холм июнь ойида узоқ танаффусдан сўнг Иоланда Вегани ҳакамларнинг якдил қарори эвазига мағлуб этганди. Холли ММАга ўтишдан олдин 2002 йилдан 2013 йилгача профессионал рингда қатнашиб, шу вақт ичида WBC, WBF ва IBA чемпионлик камарларини қўлга киритган. 2022 йилда Холм Халқаро бокс шон-шуҳрат залига киритилди. Унинг боксдаги рекорди 34 ғалаба, 2 мағлубият ва 3 дурангдан иборат.

35 ёшли Стефани Хан профессионал фаолиятида мағлубият нималигини билмай келяпти. Унинг ҳисобида 11 ғалаба бор. Шу йилнинг февраль ойида у Ханна Терлепни нокаутга учратиб, енгил вазн тоифасида WBA чемпионлик камарини қўлга киритди. Август ойида Паулина Ангелни очколар ҳисобига кўра ютиб, камар ҳимоясини муваффақиятли ўтказди.