Хуршидбек Норматов АҚШда камар учун 8 раундлик жанг ўтказди

Ушбу баҳсда ҳамюртимизга америкалик боксчи Вальтер Райт рақиблик қилди. 8 раундга мўлжалланган жанг тўлиқ давом этди. Якунда ғолиб очколар ҳисобига кўра аниқланди. Ҳакамлар якунда бир овоздан боксчимизнинг ғалаба қозонганини қайд этишди (80:72, 80:72, 79:73). Ушбу ғалаба ҳамюртимизга биринчи ўрта вазннинг NABA камарини тақдим этди. Мазкур ғалаба орқали боксчимиз рейтингда яхшигина кўтарилишга эришади. 

Шу тариқа, Норматовнинг проф боксда ўтказган жанглари сони 9 тага етди. Ҳамюртимиз ушбу жангларнинг барчасида ғалаба қозонган (3 та нокаут). Райт эса бугунгиси билан қўшиб ҳисоблаганда 24 та жанг ўтказган. 17 та жангда рақибларини мағлуб этган (8 та нокаут). Норматовга қарши жангда эса у фаолиятидаги 7-мағлубиятини қабул қилиб олди. Мағлубиятларининг биттасида у нокаутга учраган.