Хуршидбек Расулжонов Иноуэнинг Накатанига қарши эҳтимолий жанги ҳақида гапирди

"Иноуэ ва Накатани Саудия Арабистонида бўлиб ўтган бокс кечасида жуда ёрқин иштирок этишди. Иккаласи ҳам кучли рақибларни мағлуб этишди ва энди уларни рингда ўзаро жанг қилишини кўриш мантиқан тўғри бўлади. Боксчиларнинг услубларини инобатга олган ҳолда, барчамизни Янги йилда оловли жанг кутиб турибди, деб ишонч билан айтишимиз мумкин", - деди ҳамюртимиз Хуршидбек Расулжонов.

Эслатиб ўтамиз, кеча Саудия Арабистонида бўлиб ўтган бокс турнирида Иноуэ мексикалик Алан Пикассони, Накатани эса бошқа бир мексикалик Себастьян Эрнандес Рейесни ҳакамларнинг якдил қарори билан очколар ҳисобига кўра мағлубиятга учратган ва ўз чемпионлик камарларини ҳимоя қилган эди.

Расулжоновнинг ўзи эса сўнгги бор шу йилнинг ноябрь ойида Екатеринбургда рингга кўтарилиб, африкалик Лусандо Кооманисини иккинчи раундда нокаутга учратганди. Чарм қўлқоп устамиз 2026 йилда ўз вазнидаги чемпионлик камарларининг бири учун жанг ўтказиш асосий мақсади эканини айтмоқда.