Хушхабар! Каратэчимиз ўсмирлар Олимпиадасига лицензия қўлга киритди

Унда 84 мамлакатдан 325 нафарга яқин спортчи иштирок этди. Терма жамоамиз шарафини Дилдор Алиқулова (-53кг), Бону Эгамбердиева (-59кг), Шоҳрух Турсунмаҳамматов (-61кг),  Саидислом Жўраев (-68кг), Шаҳзоджон Боймухаммедов (+68 кг) каби спортчилар ҳимоя қилишди.

-53 кг вазн тоифасида мусобақада иштирок этган юртдошимиз Дилдор Алиқулова мусобақа давомида Бельгия (6:1), Чехия (0:0, ҳакамлар қарорига кўра), Озарбайжон (4:0) каби мамлакат вакилаларини мағлубиятга учратиб, ярим финалга йўл олди. Финал йўлланмаси учун кечган қийин баҳсда у Буюк Британия вакиласини мағлуб этди (4:3) ва финал чиптасини қўлга киритиш билан бирга, Аргентинада бўлиб ўтадиган ўсмирлар Олимпия ўйинлари лицензияси соҳибасига ҳам айланди. Финалда эронлик рақибга қарши кечган жангда у 1:2 ҳисобида имкониятни бой берди.

Шу тариқа спортчимиз лицензион мусобақанинг кумуш медали соҳибасига айланди. Ушбу мусобақада биринчи ва иккинчи ўрин соҳиблари Буэнос-Айрес йўлланмасини қўлга киритдилар.


Шу тариқа, Аргентина Олимпиадасига йўлланмаларимиз сони 24тага етди. Бугунги кунга келиб III ёзги ўсмирлар Олимпия ўйинлари учун терма жамоамиз ҳисобида қуйидаги спорт турларида лицензиялар мавжуд:

Спорт курашлари – 5та
Оғир атлетика – 3 та
Байдарка ва каноэда эшкак эшиш – 3 та
Академик эшкак эшиш – 3 та
Спорт гимнастикаси – 2 та
Спорт акробатикаси – 2 та
Трамполин - 1
Бадиий гимнастика – 1 та
От спорти (конкур) – 1 та
Таэквондо – 1 та
Бокс – 1 та
Каратэ – 1 та.

Эслатиб ўтамиз, III ёзги ўсмирлар Олимпия ўйинлари 6-18 октябрь кунлари Аргентинанинг Буэнос-Айрес шаҳрида бўлиб ўтади.