Хушхабар! Вячеслав Перетейко Париж-2024 Олимпиадасида ҳакамлик қилади

Ҳужжатда айтилишича, халқаро тоифадаги рефери Вячеслав Перетейко Париж-2024 Олимпиадасининг дзюдо баҳсларини бошқариб борувчи ҳакамлар рўйхатига расман киритилган. 

Таъкидлаш жоиз, Вячеслав Перетейко IJF байроғи остида ўтказиб келинаётган мусобақаларда ҳакамлик қилиб, ўзини ижобий томондан намоён эта олди. Бу эса ўз ўрнида унинг ҳакамликдаги энг олий орзусини рўёбга чиқарди.  

"Қадрли Вячеслав Перетейко! Биз сизни олимпия ўйинларида ҳакамлик қиладиган реферилар сафидан жой олганингиз билан табриклаймиз. Сиз бунга ўз меҳнатингиз ҳамда IJF байроғи остида ўтказилаётган турнирлардаги муваффақиятли ҳакамлигингиз орқали эришдингиз. Сизга бўлажак Олимпиадада ҳам омад тилаймиз", дейилади Армен Багдасаров, Ки-Йонг Жеон ва Даниэл Ласкау имзолаган мактубда.    

МАЪЛУМОТ УЧУН:

Вячеслав Перетейко - 1981 йил 19 январда Тошкент шаҳрида дунёга келган. Спортчилик фаолияти давомида асосан -90 кг вазн тоифасидаги беллашувларда юртимиз спорт шарафини ҳимоя қилган. Афина-2004 Олимпиадаси иштирокчиси, Осиё чемпионатларининг кумуш ва бронза, Осиё ўйинларининг бронза медали совриндори бўлган. 2020 йилги Токио Паралимпия ўйинларида ҳакамлик қилган. 

Фурсатдан фойдаланиб, Ўзбекистон дзюдо федерацияси Вячеслав Перетейкони ушбу муваффақият билан муборакбод этади. Токио-2020 Олимпиадасида Рамзиддин Саидов дзюдо беллашувларида ҳакамлик қилган эди.