ХХ Осиё ўйинлари. Икки ММАчимиз финалда!

Мусобақа дастурига илк бор киритилган ММА баҳсларида иштирок этаётган уч нафар аралаш яккакураш устамизнинг иккиси финал йўлланмасини қўлга киритди. Учинчи иштирокчимиз ҳали 1/2 финал жангини ўтказгани йўқ ва унда ҳам финал чиптасини расмийлаштириш имконияти бор.

-60 кг вазн тоифасида курашаётган Фирдавс Атамурадов ярим финалда қирғизистонлик Дастан Канибек Улуни 2:0 ҳисобида мағлубиятга учратди. Энди у олтин медаль учун тожикистонлик Мирзобек Умаров ва покистонлик Асим Хан ўртасидаги баҳс ғолибига қарши гиламга чиқади. 

ММА мусобақасининг аёллар ўртасидаги -60 кг вазн тоифаси беллашувида юртимиз шарафини ҳимоя қилаётган Ҳилола Собирова 1/2 финалда камбоджалик Далин Чендан устун келди. Тажрибали Собирова иккала раундда ҳам яққол устун билан зафар қучди.