XX Осиё ўйинлари. Хитойнинг медаллари 38 тага етди, шундан 23 таси олтин. Ўзбекистон Топ-10`да!

Хитой Халқ Республикаси терма жамоаси кутилганидек, медаллар жамғариш бўйича катта фарқ билан олдинга чиқиб олди. Чин юрти вакиллари кечанинг ўзида 12 та олтин медаль қўлга киритишди: 23 та олтин, 10 та кумуш, 5 та бронза, жами 38 та медаль!

Иккинчи ўриндан жой олган Япония терма жамоаси ҳисобида 8 та олтин, 12 та кумуш, 12 та бронза медали бор. Кучли учликни якунлаб турган Корея Республикаси 5 та олтин, 3 та кумуш, 15 та бронза медалига эга.  

Ён қўшниларимиз Қозоғистон терма жамоаси 4 та олтин, 1 та кумуш ва 3 та бронза медали билан 4-ўринни банд этган. 

Ўзбекистон терма жамоаси делегацияси ҳисобида ҳозирча биттадан олтин, кумуш ва бронза медали бор. Каратэчимиз Абулваҳоб Рашидов кечаги кун дастурида Ўзбекистон делегациясига илк олтин медални тақдим этди. Унинг медали эвазига ҳозирча терма жамоамиз умумжамоа ҳисобида Мьянмар билан биргаликда 9-10-ўринларни бўлишиб турибди. 

Қўшниларимиздан Қирғиз Республикаси 3 та бронза медали билан 20, Тожикистон эса 1 та бронза медали билан охирги ўринда бормоқда. Учинчи кун олдидан жами 29 давлат делегациялари камида битта медалга эга бўлиб турибди.