“Янги Ўзбекистон Олимпия чўққилари“ мусобақаларига тайёргарлик масалалари бўйича селектор йиғилиши ўтказилди

Спорт вазирлигида ушбу янги форматдаги мусобақага тайёргарлик масалаларига бағишланган селектор йиғилиши бўлиб ўтди.

Унда жойларда беллашувларни самарали ташкил этиш, мусобақа дастури, танланган спорт базаларининг ҳолати ҳамда ғолиб ва совриндорларни рағбатлантиришга доир муҳим масалалар муҳокама қилинди.

Расмийлар бу мусобақа миллий спортимизда янги бурилиш ясашини таъкидлаб, асосий мақсад — миллий терма жамоа учун рақобатбардош ва иқтидорли ёшларни саралаб олиш, ёшлар орасида оммавий спорт тарғиботини кучайтириш эканини қайд этишди.

Йиғилишда ҳудудий вакиллар билан онлайн мулоқот ўрнатилиб, тайёргарлик жараёни, мавжуд муаммолар ва камчиликлар муҳокама қилинди. Мутасаддиларга аниқ вазифалар белгилаб берилди ва камчиликларни зудлик билан бартараф этиш бўйича топшириқлар берилди.

Тадбир давомида Спорт вазирлиги ва Миллий Олимпия қўмитасининг бўлажак мусобақаларни юқори савияда ўтказиш бўйича қўшма қарори имзоланди.