Ёш қиличбозимиз Таиланддаги мусобақада биринчи ўринни эгаллади

Унда ўзбекистонлик ёш қиличбозлар сабля йўналишида юртимиз шарафини ҳимоя қилишди.

Ўғил болалар ўртасидаги беллашувларда қитъамизнинг 9 мамлакатидан 56 нафар спортчи қатнашди. Ўзбекистон терма жамоаси сафида Жалолиддин Душамбоев, Шерзод Мамутов, Бобур Расулов ва Бекзод Олимжоновлар иштирок этишди. Қувонарлиси, Жалолиддин Душамбоев мусобақа давомида икки нафар сингапурлик, шунингдек, Гонконг вакилини мағлуб этиб, финалгача етиб борди. Ҳал қилувчи баҳсда эса иорданиялик Абдалла Алталани 15:9 ҳисобида мағлуб этди ва мусобақа ғолибига айланди. 

Баҳсларда иштирок этган бошқа бир спортчимиз Шерзод Мамутов эса Иордания, Гонконг каби мамлакат вакилларини мағлуб этиб, ярим финалгача етиб борди. Финал остонасида кечган баҳсда эса иорданиялик Абдалла Алталага мағлуб бўлди ва бронза медали билан кифояланди.

Қизлар ўртасидаги баҳсларда эса Осиёнинг 7 мамлакатидан 40 нафарга яқин спортчи ўз омадини синаб кўрди. Ўзбекистон шарафини Зайнаб Дайибекова, Гулбону Есемуратова, Севила Худойбергановалар ҳимоя қилишди.

Зайнаб Дайибекова турнир доирасида Япониянинг уч нафар спортчисини мағлубиятга учратиб, финалгача етиб борди. Финалда эса гонконглик Ман Ларе Леунгга мағлуб бўлди ва якунда кумуш медаль соҳибасига айланди. Гулбону Есемуратова эса Таиланднинг икки спортчисини мағлуб этди ва ярим финалга чиқди. Ярим финалда эса гонконглик Ман Ларе Леунгга ютқазиб, бронза медалини қўлга киритди.