Юнон-рум курашчиларимиз Қозоғистондаги халқаро турнирда

Бу ҳақда Ўзбекистон спорт курашлари ассоциацияси матбуот хизмати хабар бермоқда. Ўз тарихида 22-маротаба ташкил этилаётган анъанавий мусобақада курашчилар 59, 66, 75, 85, 98 ҳамда 130 кг вазн тоифаларида медаллар учун бахсларга киришишади.

Ўзбекистон терма жамоаси таркибидан биринчи ва иккинчи рақамли полвонларимиз Феруз Тўхтаев (59 кг), Абдурашид Бердалиев (59 кг), Арам Варданян (66 кг), Дилшод Турдиев (75 кг), Муҳаммадали Шамсиддинов (85 кг), Жаҳонгир Турдиев (96 кг) ҳамда Мўмин Абдуллаев (130 кг) жой олишган.

Терма жамоа бош мураббийи Камил Фаткуллин. Мураббийлар штабидан Ғайрат Абдуллаев ва Равшан Рўзиқулов  ўрин олишган. Қаҳрамон Ибрагимов эса Семей турнирига ҳакам сифатида таклиф этилган.

Халқаро турнирда мезбонлар ва Ўзбекистон полвонларидан ташқари, Россия, Беларусь, Қирғизистон каби ўнга яқин давлатдан юнон-рум курашчилар иштирок этишяпти.