Юртимизда шорт-трек ва кёрлинг турларини ҳам ривожлантирамиз

МОҚ ва Ассоциация раҳбарияти мазкур тадбирлар якуни ва келгуси режалар хусусида суҳбатлашди. Унда МОҚ раиси Рустам Шоабдураҳмонов ва унинг биринчи ўринбосари Равшан Ирматов, Қўмита Бош котиби Ойбек Касимов, Искандер Шадиев бошчилигидаги Ўзбекистон қишки спорт ассоциацияси мутасаддилари иштирок этишди.

Даставвал Искандер Шадиев ўтказилган тадбирлар таассуроти ҳақида гапириб ўтди.

“Ушбу мусобақа якунида жамоамиз билан кўплаб хулосалар чиқардик. Улар орасида фигурали учиш спортига ихтисослашган мактаб очиш, терма жамоага хорижлик мураббийни жалб қилиш асосий планга чиқмоқда. Таниқли мураббий Этери Тутребидзе ушбу спортни юртимизда ривожлантириш бўйича ҳамкорликка тайёр эканлигини билдирди. Мусобақа ҳақида эса ота-оналар ва ёш спортчиларимиз ўзларининг илиқ фикрларини билдириб ўтишди”, – деди Ўзбекистон қишки спорт турлари ассоциацияси раиси.

Шунингдек, МОҚ раиси келгуси режалар борасида ўз фикрлари билан ўртоқлашди.

“Аввало, селекция ишларига алоҳида аҳамият қаратиш зарур. Хорижлик мутахассисларнинг мазкур жараённи ўзлари амалга оширишини мен ҳам маъқуллайман. Ҳукуматимиз қишки спорт турларини ривожлантиришга ҳам катта эътибор қаратмоқда. Биз бу борада ўз режаларимизни қадам ба қадам ҳисоб-китоб қилиб олишимиз лозим. Бу йўлда Миллий Олимпия қўмитаси барча ёрдамни кўрсатишга тайёр”, – деди Рустам Шоабдураҳмонов.

Тадбир давомида юртимизда мавжуд объектлардан унумли фойдаланган ҳолда шорт-трек, кёрлинг каби қишки спорт турларини ҳам ривожлантириш, бунинг учун мавжуд базаларни кўздан кечириш, бу борада ёш спортчиларга барча шароитларни яратиб бериш каби масалалар атрофлича муҳокама қилинди.