Загреб Гран-приси. Дзюдочиларимизнинг омадсиз старти

Ушбу мусобақада ўзбекистонлик дзюдочилар ҳам иштирок этишяпти. Гран-прининг биринчи куни -60 кг вазн тоифасидаги вакилимиз Диёрбек Ўрозбоев илк баҳсидаёқ словакиялик Матьяж Трбовичга имкониятни бой бериб қўйди. Мазкур вазнда япониялик Наохиса Такато ғолиблик шохсупасига кўтарилди. 

-66 кг вазн тоифасидаги дзюдочимиз Шаҳрам Аҳадов учинчи учрашувида ютқазди. У аввалига Саудия Арабистони вакили Абдулазиз Албашини, кейин беларуслик Дмитрий Минкоуни таслим этди. Аммо, учинчи босқичда россиялик Арам Григорянга имкониятни бой бериб, мусобақадаги иштирокини тўхтатди. 

Айнан шу вазнда иштирок этган яна бир полвонимиз Сардор Нуруллаев эса иккинчи даврада ютқазди. У Босния ва Герцеговиния вакили Петар Задродан устун келди, аммо қозоғистонлик Гумар Киргизбаевга имкониятни бой бериб қўйди. Бу вазнда исроиллик Тал Фликкер чемпион бўлди. 

Бугун Ғиёсжон Бобоев, Ҳикматиллоҳ Тўраев (иккиси ҳам -73 кг вазнда),  Шарофиддин Болтабоев (-81 кг), Давлат Бобонов, Шаҳзодбек Собиров (иккиси ҳам -90 кг) ўз имкониятларини синовдан ўтказишади.