29 июл 10:46
Янгиликлар
Загреб Гран-приси. Дзюдочиларимизнинг омадсиз юриши давом этади
Ушбу мусобақада ўзбекистонлик дзюдочилар ҳам иштирок этишяпти. -73 кг вазн тоифасидаги ҳамюртимиз Ғиёсжон Бобоев илк учрашувидаёқ украиналик Артём Хомулага ютқазиб қўйди. Ушбу вазндаги иккинчи вакилимиз Ҳикматиллоҳ Тўраев эса аввалига голландиялик Сэм Ван Вестендени, кейин туркиялик Мурат Бекташни мағлуб этди. Лекин учинчи босқичда швециялик Томми Макьясга имкониятни бой берди.
-81 кг вазн тоифасидаги полвонимиз Шарофиддин Болтабоев илк даврада тожикистонлик Акмал Муродовни енгди. Иккинчи босқичда рақиби бўлмагани учун курашсиз кейинги даврага чиқди. Аммо, кейин грециялик Алексиос Нтанатсидисга ютқазиб қўйди.
Эслатиб ўтамиз, Гран-прининг биринчи куни -60 кг вазн тоифасидаги вакилимиз Диёрбек Ўрозбоев илк баҳсидаёқ словакиялик Матьяж Трбовичга, -66 кг вазн тоифасидаги дзюдочимиз Шаҳрам Аҳадов учинчи учрашувида россиялик Арам Григорянга, шу вазнда иштирок этган Сардор Нуруллаев эса қозоғистонлик Гумар Киргизбаевга имкониятни бой бериб қўйган эди.
Фикрлар