Зўр хабар. Богдан Гусковнинг жанги тасдиқланди

Рамазон Темировдан кейин Богдан Гусковнинг ҳам 26 июль куни UFC Абу-Даби турнири кардида жанг ўтказиши маълум бўлди. Яримоғир вазндаги аралаш яккакураш устамиз шу куни россиялик 33 ёшли Никита Криловга қарши октагонга чиқади. 

Крилов апрель ойида икки йиллик танаффусдан сўнг октагонга қайтган ва бироз кутилмаганда биринчи раунднинг ўзида нокаут эвазига Доминик Рейесга имкониятни бой бериб қўйганди. Никита бу мағлубиятига қадар учта жангда ғалаба қозонганди. 

Ангренлик 32 ёшли Богдан Гусков эса учта ғалабали серия билан келмоқда. Ўзининг  дебют жангида тажрибали Волкан Оздемирга ютқазган ҳамюртимиз кейин Зак Пауга ва Райан Спэнн устидан нокаут эвазига ғалаба қозонди, Билли Элеканни эса гильотина усули билан таслим этганди.

Айни пайтда Никита Крилов UFC яримоғир вазн тоифаси рейтингида ўнинчи, Гусков эса ўн тўртинчи ўринни эгаллаб турибди. 

Маълумот учун, UFC Абу-Даби турнирида ҳамюртимиз Рамазон Темиров қозоғистонлик Асу Алмабаевга қарши жанг қилади. Ушбу оқшомнинг асосий жанги ўрта вазн тоифаси рейтингида бешинчи ўринни эгаллаб турган австралиялик Роберт Уиттакер ҳамда 13-поғонадаги Нидерландия вакили Ренье де Риддер ўртасида бўлиб ўтади.