Abduraimova Dubay turnirida yana bir kuchli raqibasini taslim etdi

Mukofot jamg'armasi 100 000 AQSH dollarini tashkil etuvchi ushbu turnirda hamyurtimiz Nigina Abduraimova ham muvaffaqiyatli odimlamoqda. Mamlakatimizning birinchi raketkasi ilk davrada germaniyalik tajribali tennischi Sabin Lisickini 6/3, 6/4 hisobida mag'lubiyatga uchratgandi. 

Nigina hozirgina yakuniga etgan 1/8 final uchrashuvida rossiyalik Ekaterina Makarovadan ham ustun keldi. Bir soatu 47 daqiqa davom etgan bahsda Abduraimova reytingda o'zidan yuqorida borayotgan raqibasini 6/0, 2/6, 6/2 hisoblarida taslim etdi. Tennischilarning o'zaro uchrashuvlaridagi hisob 2:0 ko'rinishiga keldi. 

Taqqoslash uchun, Abduraimova WTA reytingida 245, Makarova esa 188-o'rinni egallab turibdi. Tennischilarning o'zaro ilk uchrashuvi 2022 yilning 22 iyun kuni Berlinda o'tkazilib, unda Nigina Ekaterina Makarovani uch set natijasiga ko'ra mag'lubiyatga uchratgandi. Abduraimovaning 1/4 finaldagi raqibasi kechroq malum bo'ladi.