Artur Grigoryanga ilk mag'lubiyatni taqdim etgan bokschi 50 yoshida faoliyatini yakunladi

O'sha jangda charm qo'lqop ustamiz engil vazn toifasida o'ziga tegishli WBO chempionlik kamarini 18-marotaba himoya qilish uchun ringga ko'tarilgandi. Ungacha Arturning deyarli barcha janglari Germaniyada o'tkazilgan edi. 

Afsuski, ilk bor AQSHda jang qilgan Grigoryan o'n ikki raund to'liq davom etgan chempionlik jangida yosh Aselino Freytasga ochkolar hisobiga ko'ra imkoniyatni boy berib qo'ygandi. Braziliyalik bokschi hakamlarning yakdil qarori bilan 115:108, 116:107, 116:107 hisobida g'alaba qozonib, Grigoryandan WBO chempionlik kamarini tortib olgandi.  

Ikki vaznda sobiq jahon chempioni Aselino Freytas 50 yoshida faoliyatini yakunlaganini elon qildi. U hatto ko'rgazmali janglar uchun ham ringga qaytmasligini aytmoqda. 

Freytas boksdan ketish sabablaridan biri sifatida yaqinda Vanderley Silva bilan bo'lib o'tgan jangdagi janjalni keltirgan. Jang yakunida ringda har ikki bokschi jamoalari o'rtasida janjal kelib chiqqandi. "Bu men uchun qanchalik sharmandalik bo'lganini tasavvur ham qilolmaysiz. Ringda boshdan kechirganlarimning barchasidan o'tish, boshqa jangchini almashtirish - bu pul uchun emas, menga pul kerak emas, shunchaki tadbir barbod bo'lmasligi uchun. Silvaning murabbiyi ringga chiqib, meni qattiq urganida, bu xo'rlikni boshdan kechirish. Men uchun bu jangchi sifatida boshimdan kechirgan eng yomon xo'rliklardan biri edi. Bugun bu erda turib, butun Braziliyaga murojaat qilishimning sabablaridan biri ham aynan shu voqeylikdik", - dedi Freytas promouter sifatida ishtirok etayotgan boks oqshomiga bag'ishlangan matbuot anjumanida.