Australian Open. Turnir tarixi, statistika va boshqalar

Melburn shahridagi "Melburn Park" sport majmuasida o'tkaziladi. Musobaqaning asosiy o'yinlari ikki hafta davomida - yanvar oyida o'tkaziladi. To'qqiz yo'nalishda g'oliblar aniqlanadi: beshtasi kattalar, to'rttasi o'smirlar o'rtasida.

Musobaqa tarixi

Turnir ilk marotaba 1905 yilda "AvstralOsiyo chempionati" nomi bilan o'tkazilgan. O'sha musobaqada 17 nafar sportchi qatnashgan. O'yinlarni tomosha qilish uchun 5 mingga yaqin tomoshabin tashrif buyurgan. 1927 yilga kelib esa turnir "Avstraliya chempionati"ga o'zgartirilgan. 1969 yildan boshlab musobaqa barcha professional tennischilar uchun ochiq deb elon qilingan.

1905 yildan boshlab turnir 6 ta shaharda o'tkazilgan:

Melburn (54 marotaba)

Sidney (17 marotaba)

Adelaida (14 marotaba)

Brisben (7 marotaba)

Pert (3 marotaba)

Yangi Zelendiya (2 marotaba)

1972 yilda turnirni xar yili bitta shaharda o'tkazish haqida qaror qabul qilingan. O'yinlarni o'tkazish uchun Melburnga yaqin hisoblangan Kuyong shaharchasidagi chimli qoplamali kortlar tanlangan. Vaqt o'tib, Kuyong yuqori saviyadagi turnirlarni o'tkazish uchun qorong'i va torlik qilib qoladi. 1988 yilda esa yangi "Melburn Park" tennis majmuasi qurilishi yakunlanadi va o'yinlar o'sha erda o'tkaziladi. Bahslarni ko'chirish o'zini oqlaydi: o'yinlarni tomosha qilish uchun tashrif buyuruvchi muxlislar oqimi ko'payadi. 1988 yilgi bahslarga tashrif 90 foizga ko'tarildi va 266 436 nafarni tashkil qildi. Taqqoslash uchun, Kuyongda bir yil oldingi musobaqada 140 000 muxlis yig'ilgandi.

Kuyongda stadion bilan bog'liq muammolar (kort notekisligi, yorug'lik, shart-sharoit) musobaqaning ommabopligiga o'z tasirini ko'rsatmay qolmagan. Etakchi tennischilar musobaqa bo'ladigan vaqtda boshqa turnirlarda yirik miqdordagi pullar yutardilar. Kris Evert faoliyatining cho'qqisida chempionatni ketma-ket olti marotaba o'tkazib yuborgan. Martina Navratilova esa to'rt marotaba musobaqaga bormaslikka qaror qilgan. Born Borg esa 1974 yildan keyin Avstraliya ochiq chempionatida umuman qatnashmagan.

Kortlar

"Melburn Park" tennis majmuasining oddiy, 3 ta markaziy va 3 ta ko'rgazmali kortlari bor.

Turnirning asosiy korti - "Rod Leyver Arena" avstraliyalik afsonaviy tennischi Rod Leyverning nomiga qo'yilgan. Arena 1988 yilda qurilgan va o'z bag'riga 15 000 tomoshabinni sig'dira oladi. Yiliga 1,5 milliondan ortiq tomoshabin tennis uchrashuvlarini tomosha qilish uchun bu erga tashrif buyuradilar. Kort yopiladigan tomga ega. Arenada yomg'ir yoki jazirama vaqtida ham o'yinlar o'tkazsa bo'ladi.

Ikkinchi kort esa "Hisense Arena" deb ataladi. 2000 yilda qurilgan. Bu erda turli tadbirlarni ham tashkil qilsa bo'ladi. Arenada tennis turnirlaridan tashqari velosport, basketbol kabi o'yinlar ham bo'lib o'tadi. Tennis va basketbol o'yinlari vaqtida bu erga 10 500 tomoshabin sig'adi. Bu erda ham usti yopiladigan tom mavjud.

Uchinchi markaziy kort esa "Margeret Kort arena" hisoblanadi. Kort nomi Avstraliya tarixidagi muvaffaqiyatli tennischilardan biri Margaret Kortning sharafiga qo'yilgan.

Barcha kortlar xard qoplamali hisoblanadi.

Erkaklar o'rtasidagi musobaqa g'oliblariga Norman Bruks nomidagi mukofot beriladi.

Qizlar o'rtasida tengsiz topilgan sportchiga esa boshqa bir avstraliyalik tennischi Dafna Akxyorst sharafiga nomlangan sovrin topshiriladi.

Turnir rekordlari va statistika

Eng yosh g'oliblar:

Erkaklar: Ken Rozuoll - 18 yosh, 2 oy (1953)

Ayollar: Martina Xingis - 16 yosh, 3 oy (1997)

Yoshi katta g'oliblar:

Erkaklar: Ken Rozuoll - 37 yosh, 2 oy (1972)

Ayollar: Telma Long - 35 yosh, 8 oy (1954)

Ketma-ket g'alaba qozonish bo'yicha seriyalar:

Erkaklar: Roy Emerson - 5 marotaba (1963-1967)

Ayollar: Margaret Kort - 7 marotaba (1960-1966)

Finallarda eng ko'p o'ynagan tennischilar:

Erkaklar: Novak Jokovich - 6 marotaba

Ayollar: Serena Uilyams - 8 marotaba

Eng uzoq davom etgan o'yin:

Erkaklar: (353 daqiqa) - Novak Jokovich - Rafael Nadal. 5-7 6-4 6-2 6-7(5) 7-5 (2012, final)

Ayollar: (284 daqiqa) - Francheska Skyavone - Svetlana Kuznecova. 6-4 1-6 16-14 (2011, to'rtinchi bosqich)

Eng ko'p chempion bo'lganlar:

Erkaklar: Roy Emerson, Novak Jokovich - 6 martadan

Ayollar: Margaret Kort - 11 marotaba