Badantarbiya – mustahkam salomatlik garovi!

Nukus shahridagi 1-bolalar va o'smirlar sport maktabining sport majmuasiga tongi soat 6.00 da kelganimizda bir guruh nuroniylarning ertalabki badantarbiya bilan shug'ullanayotganining guvohi bo'ldik.

– Ertalabki badantarbiyaning inson salomatligiga foydasi beqiyos, – deydi 79 yoshdagi aloqa sohasi fahriysi Hokimniyoz Embergenov. – CHunki, inson kun bo'yi o'zini yaxshi his qilib yuradi, ishtahasi yaxshilanadi, har qanday kasalliklardan xoli bo'ladi. SHuning uchun ham badantarbiya bilan shug'ullanishni kundalik odatga aylantirganmiz. O'zim 1994 yildan buyon muntazam shug'ullanib kelaman. Guruhimiz madaniyat, talim, sog'liqni saqlash, xizmat ko'rsatish va boshqa turli soha vakillaridan tashkil topgan.

– Oilaviy kelib ertalabki badantarbiya bilan muntazam shug'ullanamiz, – deydi Qoraqalpog'iston Respublikasiga xizmat ko'rsatgan arxitektor, Berdaq nomidagi Qoraqalpoq davlat mukofoti sovrindori Orinboy To'reniyazov. – Yoshlarimiz o'rtasida jismoniy tarbiya va sport, shu jumladan, ertalabki badantarbiya bilan shug'ullanishni targ'ib qilishimiz kerak. Bunda biz faxriylar yoshlarga o'rnak bo'lishimiz kerak. Bu aholi salomatligini mustahkamlash bilan bir qatorda jinoyatchilikning oldini olishga xizmat qiladi. CHunki sport bilan muntazam shug'ullangan kishidan yomonlik chiqmaydi.

Ertalab Nukus ko'chalari bo'ylab yurar ekanmiz, faxriylarning, yoshlarning, xotin-qizlarning badantarbiya bilan shug'ullanayotgani bizni quvontirdi. O'zimiz ham bundan chetda qolmasdan, har kuni shug'ullanishni maqsad qildik.