Bogdan Guskov: "Bu vaziyatda nima haqida o'ylash kerak edi?"

U jarohat olgan Xalil Rauntri o'rnini egallab, UFC Abu-Dabi turnirida oktagonga chiqadi.

"Hikoya shunday bo'lgan: menejerim qo'ng'iroq qilib, shunday imkoniyat borligini aytdi. Men esa: “Xo'p”, dedim. U esa: “Men seni majburlamayapman, hech narsani ilgari surayotganim ham yo'q, lekin 24 soat o'ylab ko'r va javob ber”, dedi.

Suhbat tugagach, trubkani qo'ydim va oradan 30 soniya ham o'tmay: “Bu erda nima haqida o'ylash kerak?” dedim. Darhol unga qayta qo'ng'iroq qildim. Rostdan ham 30 soniya o'tgan edi. CHunki bu erda o'ylaydigan narsaning o'zi yo'q edi.

Ayrimlar kabi men vazn qilishga ulgura olamanmi-yo'qmi deb hisoblash, qancha vazn tashlashim kerakligini o'ylash yoki kimdir 16 soat uchishi kerakligini bahona qilish shart emasdi. Xullas, hamma rad etaverdi. Men esa samolyotdan tushiboq jang qilishni hech kim istamasligini yaxshi bilardim.

Yan Blaxovich vazn qilishga 24 soat ketganini aytdi. Bu ertak, xolos. Keyin mening jangim elon qilingach, hammaning tili chiqib qoldi: kimdir taklif bo'lganini, kimdir rozi bo'lganini ayta boshladi. Lekin oxir-oqibat bu jangni Bogdan olib qo'ygandi", — dedi Guskov.