Bu qiziq! Prof boks yulduzlarini mag'lub etgan hamyurtlarimizni bilasizmi?

Professional yo'nalishda ajoyib natijalar qayd etgan, Artur Beterbiev, Sergey Kovalyov, Kallum Smit, Migel Kotto, Janibek Alimxonuli, Billi Dib, Josh Kelli kabi bokschilar ham havaskor boksda toblanishgan. 

Ha, professional boksni larzaga solayotgan ko'plab bokschilar ham havaskorda o'z odimlarini boshlagan-ku, nega aynan bu bokschilar sanab o'tildi, degan savol tug'ilishi tabiiy...

Buning o'z sababi bor va biz bu borada so'z yuritamiz. Demak, professional boksda chempionlik kamarlarini qo'lga kiritgan ushbu bokschilar havaskor yo'nalishda aynan hamyurtlarimiz tomonidan mag'lub etilgan edi. 

Muhammadqodir Abdullaev — Migel Kotto;

Birinchi Olimpiada chempionimiz Sidneydagi Olimpiya o'yinlarining saralash bosqichida Kotto ustidan g'alaba qozongan. Puerto-Riko vakili keyinchalik professional boksda WBC, WBO, WBA chempionlik kamarlarini qo'lga kirita olgan edi. Keyinchalik AQSHda o'tgan chempionlik jangida Kotto Olimpiadadagi mag'lubiyat uchun revansh olishga muvaffaq bo'lgandi. 

Abbos Atoev — Artur Beterbiev;

Professional boksning yarim og'ir vazn toifasida sobiq mutlaq chempion Beterbiev 2007 yilgi jahon chempionati finalida Atoev tomonidan mag'lub etilgan.

Abbos Atoev — Kallum Smit;

Ikkinchi o'rta vazn toifasida sobiq WBA chempioni bo'lgan britaniyalik bokschi ham 2011 yil Germaniyadagi xalqaro turnirda hamyurtimiz to'sig'idan o'ta olmagandi.

Abbos Atoev — Sergey Kovalyov;

Buxorolik bokschimiz yana bir yulduz, yarim og'ir vazn toifasida WBO, WBA, IBF sobiq chempioni Kovalyovni 2008 yil Moskvadagi turnirda nokautga uchratgan.

Dilshod Mahmudov — Billi Dib;

Yaqin o'tmishdagi yana bir mahoratli vakilimiz Dilshod Mahmudov 2003 yil yarim engil vaznda sobiq  IBF chempioni sanaladigan Billi Dibni Tailandda o'tkazilgan jahon chempionatining saralash bahsida mag'lub qilgan edi.

Doston Turdiev — Josh Kelli;

31 yanvar kuni rossiyalik Baxram Murtazalievni mag'lub etib, birinchi o'rta vaznda IBF chempioniga aylangan Josh Kelli havaskor boksda hamyurtimiz Doston Turdievga imkoniyatni boy bergan edi. Turdiev 2014 yil Qozog'istondagi turnirda Kelliga xech qanday imkoniyat qoldirmagandi.

Bektemir Meliqo'ziev — Janibek Alimxonuli;

Hozirgi kunda professional yo'nalishda ham tobora titulga yaqinlashib borayotgan Meliqo'ziev 2015 yil Bangkok shahrida tashkil etilgan Osiyo chempionati chorak finalida qozog'istonlik o'rta vazn toifasida IBF, WBO chempioni bo'lgan Alimxonulini musobaqadan chiqarib yuborgan.

Ularni safiga Sardor Abdullaevni yoshlar o'rtasidagi jahon chempionatida Tayson Fyurini mag'lub etganini va O'tkirbek Haydarovni Andre Uordga qarshi jangidagi g'alabasini "o'g'irlashgan"ligini ham qo'shsak bo'ladi.

Xullas, shunday tarixiy janglarimiz bor va ushbu qarama-qarshiliklar  biroz yodingizga tushgan bo'lsa, ajab emas. Balki bunday janglar ro'yxatini siz muxlislar davom ettirarsiz?