Buni ko'rish kerak: 2010-2020 yillar oralig'idagi eng "yirtqichona" nokautlar

Boks sport turida oxirgi o'n yillik davomida eng chiroyli nokautlarning guvohiga aylandik. Boksda avvallari kuch ko'p narsani hal qilar edi, endilikda esa bokschilar taktikaga ham etibor bera boshlashdi, nazdimizda. Hozirda raqibingizning zaif nuqtalaridan foydalanib ham uni mag'lub eta olishingiz mumkin. Va yodingizda tuting, raqibingizni birgina zarba orqali ham "uxlatib qo'yishingiz" mumkin. Etiboringizga 2010-2020 yillar oralig'idagi eng yaxshi nokautlarni havola qilamiz. Demak, tomosha qiling!

Xuan Manuel Markes — Menni Pakyao (08. 12. 2012)

Bu ikki bokschi bir-birini juda yaxshi bilar edi, axir bu ularning naq to'rtinchi jangi edi-da, o'ziyam. Avvalgi uchta jangning barchasida Markes omadsizlikka uchragandi. To'rtinchi jangda u hammasini uzil-kesil hal qilish niyatida edi. Jangning oltinchi raundi davom etayotgan bir pallada Markes Pakyaoga juda kuchli zarba yo'llaydi, Menni bu zarbadan so'ng bir necha daqiqa o'ziga kela olmaydi.

Vladimir Klichko — Kubrat Pulev (15. 11. 2014)

Vladimir Klichko o'sha paytda og'ir vaznni nazorat qilar edi, u vaqti kelib shu vazndagi kamarlarning barini o'ziniki qilib olishi ham mumkin edi. Jangning oltinchi raundida Klichkoning raqibi yuziga yo'llagan zarbasi tufayli Pulev qaytib o'rnidan tura olmaydi. ESPN versiyasiga ko'ra bu 2014 yilning eng yaxshi nokauti edi.

Aleksandr Povetkin — Dillian Uayt (22. 10. 2020)

Boks, Povetkin, nokaut — bu uch so'zni hech qachon bir-biridan ayirib bo'lmaydi. "Rossiya ricari" ajoyib zarbalar arsenaliga ega edi. Dillian Uayt ham yulduz bokschi edi, ammo Povetkin uni chempionlik jangida mag'lub eta oldi. Uayt butun jangda favorit bo'lishi kutilgan edi, biroq beshinchi raundda rossiyalik jangchining apperkot zarbasi barcha taxminlarni yo'qqa chiqardi.

Gennadiy Golovkin — Nobuxiro Isida (30. 03. 2013)

O'rta vazn toifasidagi eng yaxshi bokschilardan biri bu shubhasiz Gennadiy Golovkin edi. 2013 yilda uning tajribali Isidaga yo'llagan zarbasi ancha mashhur bo'lib ketadi, yaponiyalik bokschining shu zarbadan so'ng o'ziga kelishi qiyin kechadi.

Saul Alvares — Amir Xan  (2. 05. 2016)

WBC kamari uchun kechgan jangda Xan yaqqol ustunlikka erishishi kutilgan edi. Biroq Saul Alvares raqibiga ketma-ket zarbalar yo'llaydi. O'ng tomondan yo'llangan xuk zarbasi Amirning ko'z o'ngiga butun hayotini keltirib yuborgan bo'lsa ajabmas.