CHirchiq sport maktabi murabbiyi Taypeyda oltin medal qo'lga kiritdi

Ahamiyatlisi, mazkur nufuzli xalqaro musobaqada ishtirok etgan hamyurtimiz Avaz Korganov 90 kg. vazn toifasida barcha raqiblarini mag'lubiyatga uchratib, oltin medalni qo'lga kiritdi. 

Ayni paytda 37 yoshda bo'lgan oltin medal sohibi Avaz Korganov bolaligidan hozirga qadar dzyudo gilamida Vatani, jamoasi manfaatini, yutuqlarini munosib himoya qilib kelmoqda. Avaz Korganov 2007 yil, 19 yoshida O'zbekiston chempioni bo'lib, mamlakat milliy terma jamoasiga qabul qilindi. Terma jamoa safida  2008 yilda Tokioda o'tgan jahon chempionatida jamoaviy bahslarda kumush medalga erishdi.

SHuningdek, terma jamoa tarkibida unga 2009 yil Turkiyada, 2011 yil Eronda, 2012 yilda Toshkentda o'tgan xalqaro musobaqalarda kuchli uchlikdan joy olish nasib etdi. Jarohati tufayli London-2012 Olimpiadasida qatnasha olmagan bo'lsa-da, dzyudo sportni tashlab ketmadi. Aksincha, maydonga murabbiy sifatida qaytishga muvaffaq bo'ldi. Bir muddat Sergeli tuman sport maktabida murabbiylik qildi, so'ngra uch yil davomida Janubiy Koreyada ham faoliyat ko'rsatdi. 

2021 yildan CHirchiq shahar sport maktabida dzyudo bo'limida ishlash asnosida ko'plab yoshlarni o'z ortidan ergashtira oldi. Yaniki, shogirdlarini ham o'zi kabi dyuzdo gilamidan g'olibona tark etishga o'rgatdi va o'rgatmoqda. Dzyudo sirlarini o'rganayotgan 50 nafardan ortiq o'g'il-qizlar orasida iqtidorlilari talaygina. 

Darvoqe, Avaz Korganov 2024 yil noyabr oyida AQSHning Las-Vegas shahri mezbonlik qilgan dzyudo bo'yicha faxriylar o'rtasidagi jahon chempionatida ham 90 kg. vazn toifasida italiyalik, braziliyalik, AQSH hamda franciyalik kurashchilarni engib, finalga qadar etib borib, kumush medal sohibiga aylangandi. Demak, marra baland olingan va  mashg'ulotlarga zo'r berilganki,  endigi urunish oltinga aylandi. 

Barakalla  sportchi - murabbiy!

Ilhom RAHMONOV tayyorladi