Denis Istomin uchun mavsum qanday o'tdi? Hamyurtimiz yil davomida qancha pul ishladi?

Bugun biz siz bilan mamlakatimizning birinchi raqamli tennischisi Denis Istomin ushbu mavsumni qanday o'tkazganligi haqida qisqacha tahlil qilib o'tamiz.

Istomin uchun bu yil omadli keldi desak mubolag'a qilmagan bo'lamiz. Garchi, "Katta dubulg'a" musobaqalarida yaxshi natijalarni qayd eta olmagan bo'lsada, biz yaxshi bilamizki hamyurtimiz tajribasi evaziga boshqa turnirlarda yaxshiroq ishtirok etib, doim reytingdagi balansni ushlab tura oladi va kuchli yuzlikning doimiy vakili hisoblanadi. Istomin bu mavsum Brisben va SHtutgart shaharlarida bo'lib o'tgan ATP 250 turnirlari chorak finaligacha, Avstriyaning Kicbyuel shahridagi turnirni saralashdan boshlagan bo'lsada, finalga qadar etib bordi va hal qiluvchi bahsda slovakiyalik Martin Klijanga 2:6, 2:6 hisobida yutqazdi va vice-chempionga aylandi. AQSHning CHikago va Qozog'istonning Astana shaharlarida bo'lib o'tgan "CHellenjer" musobaqalarida zafar quchdi.

Denis Istomin bu mavsumda umumiy hisobda (Devis kubogi, ATP, "CHellenjer") yakkalikda 55 marotaba (29 g'alaba, 26 mag'lubiyat), juftlikda esa 14 marotaba (6 g'alaba, 8 mag'lubiyat) kortga chiqdi. Undan tashqari 19-25 avgust kunlari Indoneziyaning Palembang shahrida Osiyo o'yinlari doirasida barcha raqiblarini mag'lubiyatga uchratib, to'rt yil avvalgi kumushni oltin medalga aylantira oldi.

Istomin bu yil ATP musobaqalarida umumiy 493,370 AQSH dollari pul mukofoti ishlab oldi. Faoliyati davomidagi jamg'argan pul mukofotlari qiymati esa 5,860,155 AQSH dollariga etdi. Ushbu mavsumni jahon reytingida 93-o'rinda yakunladi.

Kelayotgan 2019 yilgi mavsumni qahramonimiz Hindistonning Puna shahrida bo'lib o'tadigan ATP 250 musobaqasida boshlaydi va keyin katta ehtimol bilan Avstraliyaga yo'l oladi. Hamyurtimizga kelayotgan mavsumda ulkan zafarlar tilab qolamiz!

Husniddin Mirzaliev