Dilshodbek Ro'zmetov AQSHdagi promouterlik kompaniyasi bilan shartnoma imzoladi

24 yoshli charm qo'lqop ustamiz 2021 yilning dekabr oyida prof boksda debyut qilgan edi. SHundan so'ng u prof ringda 3 ta jang o'tkazdi va barchasida g'alaba qozondi.

Havaskor boksda 2019 yilda Ekaterinburg (Rossiya) shahrida tashkil etilgan jahon chempionatida kumush medalni qo'lga kiritgan, Tokio-2022 Olimpiadasi ishtirokchisi, 2021 yilda Dubay (BAA)da o'tkazilgan Osiyo chempionati g'olibi hisoblangan Dilshodbek Ro'zmetov mashg'ulotlarni AQSHda davom ettirmoqda.

"Fight Game Advisors" kompaniyasi prezidenti Piter Kan Ro'zmetov bilan kelishuv elon qilingach, bokschimiz haqida iliq fikr bildirdi:

"Men Dilshodbek bilan uning professional faoliyatiga yo'l-yo'riq ko'rsatish uchun hamkorlik qilayotganimni elon qilishdan juda mamnunman. 2020 yilgi Olimpiadada O'zbekiston sharafini himoya qilganidan so'ng uning uslubi professional darajaga moslashtirilganini ko'rish mumkin edi. Men oldinda nimalar kutayotganidan hayajondaman".

O'z o'rnida Dilshodbek Ro'zmetov ham bu kelishuvdan mamnun ekanini yashirmadi:

"O'zbekistonda boks boshqa sport turlariga qaraganda ko'proq rivojlangan. Yaxshi bokschilarning barchasi yirik promouterlar bilan shartnoma imzolagan. Men Piter Kan bilan shartnoma imzoladim va chin dildan ishonamanki, men o'zbekistonliklar orasida katta promouter bilan shartnoma imzolab, jahon chempioni bo'lish ilinjidagi navbatdagi bokschiman. Piterning tajribasi va muvaffaqiyati bilan men o'z oldimda katta imkoniyatlar paydo bo'lishiga shubha qilmayman," - dedi Ro'zmetov.

Dilshodbek Ro'zmetov hozirda Florida shtatining Boka-Raton shahrida Artyom Kuzminov va Derik Santos bilan birgalikda mashg'ulot olib bormoqda.