Doniyor Rixsiboev: "Maqsadimiz - shogirdlarimiz xalqaro arenalarda yurtimiz shanini ulug'lash"

Toshkent viloyati yoshlar siyosati va sport bosh boshqarmasi tasarrufidagi Yakkakurash sport turlariga ixtisoslashtirilgan sport maktabida tarbiyalanuvchilarining ham yagona orzu-istaklari sportda etakchilar qatoridan joy olish. Mazkur sport maktabida ayni paytda sportning boks, velosport (shosse), velosport (mtb), dzyudo, og'ir atletika, taekvondo WT, erkin kurash, yunon-rum kurashi, o'q otish, kurash, qo'l jangi, shotakan karate-do, paravelosport, para pauerlifting turlari bo'yicha 793 nafar o'g'il-qizlar 72 nafar malakali murabbiylar qo'l ostida mashg'ulotlarda ishtirok etishadi.  

Sport maktabida mashg'ulotlarga zo'r berayotgan yoshlarning musobaqalardagi natijalarini etirofga loyiq deyish mumkin. Malumotlarga ko'ra, birgina joriy yilning o'tgan olti oyi yakuni bo'yicha O'zbekiston chempionati va kubogida 77, Osiyo chempionati va kubogida 8, Jaxon chempionati va kubogi bellashuvlarida 3 nafar sportchi g'olib va sovrindorlar safidan o'rin egallagan.

Jumladan, taekvondo WT bo'yicha bo'lib o'tgan jahon chempionatida Svetlana Osipova kumush, Feruza Sodiqova bronza medallariga egalik qilishgan bo'lsa, Toshkent shahrida boks bo'yicha kattalar o'rtasida o'tkazilgan jahon chempionatida Oybek Jo'raev kumush medalga ega chiqqan.  

SHuningdek, Osiyo chempionati va kubogi musobaqalarida Abdulla Rajabov, Muhammadqodir Mamirjonov (boks), Odinaxon Hamdamova, Mirjalol Qurbonov (para velosport), Pokiza Kamoliddinova, Artyom SHturbabin (kurash), Ixtiyor Botirov (yunon rum-kurashi), Jamila Panfilova (og'ir atletika) g'olib va sovrindorlar qatoridan o'rin egallashga muvaffaq bo'lishgan. 

Bundan tashqari sport maktabining sportchi-o'quvchilaridan bo'lgan Javohir Soxibov (o'q otish), Mirzakamron Yunusov (boks), SHohrux Saidov (boks) O'zbekiston chempionati va kubogi hamda xalqaro musobaqalarda yuqori natijalarga erishgani bois, oliy talim muassasalariga imtiyozli kirish yo'llanmasiga ega bo'lishgan.

Yoki yaqinda Belarus Respublikasida bo'lib o'tgan II MDH davlatlari o'yinlarida Gulbonu Qambarbekova oltin (o'q otish), Jamila Panfilova oltin  (og'ir atletika), Ilyosjon Abdunazarov 5-o'rin (yunum-rum kurash), Alimardon Abdullaev 5-o'rin (yunum-rum kurash), Aselxon Aralbaeva bronza (dzyudo), Akere Sagindikova bronza (dzyudo), Zarina Jamalova bronza (dzyudo), SHavkatjon Boltaev oltin (boks) hamda Qobiljon Ahmedov oltin (sambo) medallarini qo'lga kiritib, yurtimiz sharafini munosib himoya qilishgan. 

Etiborlisi, bugun sport maktabining 83 nafar shug'ullanuvchilari sport turlari bo'yicha O'zbekiston terma jamoalarining asosiy va zahira tarkibi azolari sanalishadi. Sport maktabi tomonidan 8 nafar “Xalqaro toifadagi sport ustasi” va 23 nafar "Sport ustasi” unvonli sportchilar tayyorlangan.

SHuningdek, mazkur Yakkakurash sport turlariga ixtisoslashtirilgan sport maktabi direktori Doniyor Rixsiboev boshchiligidagi jamoa yashil makon umummilliy dasturiga ham alohida etibor qaratgan deyish mumkin. Boisi,   sport maktabining Angren shahri, Bo'stonliq tumanidagi CHorvoq qo'rg'onida joylashgan sport bazalari hududlari turli xil manzarali va mevali daraxt ko'chatlari ekilib, parvarish qilinmoqda.

Doniyor RIXSIBOEV, Toshkent viloyati yoshlar siyosati va sport bosh boshqarmasiga qarashli Yakkakurash sport turlariga ixtisoslashtirilgan sport maktabi direktori:

- Jismoniy tarbiya va sportni, jumladan, bolalar sportini rivojlantirish, ommaviylikni taminlash asosiy vazifalarimizdan sanaladi. Sport maktabimizda mavjud sport turlari bo'yicha mashg'ulotlarga zo'r bergan o'g'il-qizlarimiz orasida istedodli, metin irodali sportchilar ko'pchilikni tashkil etadi. 

Selekciya ishlari orqali yana ham iqtidorli yoshlarni jalb etib, ularning mahoratlarini oshirib borish va katta sport sari yo'naltirish, mamlakat terma jamoalariga munosib izdoshlarni etkazib berish va shu orqali xalqaro sport maydonlarida, olimpiya o'yinlarida yurtimiz shani va obro'si uchun bor mahoratini namoyon etib, eng kuchli sportchilar qatorida ko'rish bosh maqsadlarimizdan hisoblanadi. Bir so'z bilan aytganda,  mashg'ulotlar avji pallasida, yaratilayotgan qulay sharoitlardan maqsadli foydalanayotgan o'g'il-qizlar irodalarini mustahkamlab, chempionlik tomon dadil borishmoqda.   

Ilhom RAHMONOV tayyorladi