Dunyoning birinchi raketkasi boshladi

Mukofot jamg'armasi 3 million 20 ming 535 dollarni tashkil etuvchi musobaqada dunyoning birinchi raketkasi Novak Jokovich ham qatnashmoqda. Serbiyalik tennis yulduzi ilk davra uchrashuvida reytingning 130-pog'onasida borayotgan chexiyalik Tomash Maxachni 6/3, 3/6, 7/6(1) hisobida mag'lub etdi. 

Ikki soatu 27 daqiqa davom etgan bahsda Jokovich 12 ta eys, 8 ta qo'shxato va 3 ta breyk qayd etdi. Maxach esa 6 ta eys, 4 ta qo'shxato hamda 3 ta breykka erishdi. Bu tennischilarning o'zaro o'tkazgan ilk uchrashuvi edi. Endi Novak ikkinchi davrada niderlandiyalik Tallon Grikspurga qarshi kortga chiqadi.