FIFA kunlarida uchta o'yin o'tkazamiz, Osiyo Kubogidagi raqiblarimiz-chi?

Qishda Saudiya Arabistonida bo'lib o'tadigan Osiyo Kubogiga jamoalar tayyorgarlikni boshlab yuborgan. Malumki, ushbu musobaqada 24ta terma jamoa ishtirok etadi.

O'zbekiston milliy terma jamoasi "B" guruhidan joy olgan bo'lib, o'z uchrashuvlarini Bahrayn, KXDR va Iordaniyaga qarshi o'tkazadi. Ushbu musobaqaga jiddiy hozirlik ko'rishni maqsad qilgan jamoamiz joriy FIFA kunlarida uchta o'rtoqlik uchrashuvida maydonga tushadi.

24 sentyabr. O'zbekiston - Eron
1 oktyabr. O'zbekiston - Suriya
6 oktyabr. Janubiy Koreya - O'zbekiston

Jahon chempionatidan keyin dastlabki nazorat bahsini ertaga Farg'onadagi "Istiqlol" stadionida Eronga qarshi o'tkazamiz. Bahs soat 19:00da start oladi. Vakillarimiz shundan so'ng Toshkentga qaytib, 1 oktyabr kuni Suriya termasiga qarshi maydonga tushishadi. Katta ehtimol bilan mazkur bellashuv "Paxtakor" stadionida bo'lib o'tadi.

Undan keyin safarga yo'l olamiz va 6 oktyabr kuni Janubiy Koreya bilan o'ynaymiz. Uyda ikkita o'yin o'tkazishimiz tushunarli, lekin nima uchun uchinchi uchrashuvni safarda, bo'lib ham uzoqda o'tkazishimiz g'alati.

Aytaylik, uydagi ikkita o'yindan so'ng Janubiy Koreya bilan safarda rasmiy bahs bo'lsa ham mayli edi. Bu o'z-o'zidan koreyaliklar manfaatini ko'zlab tashkil qilingan uchrashuvga o'xshab qolyapti. Uzoq o'lkaga borib ikkita o'ynab qaytishni tushunsa bo'ladi, lekin bitta o'yin uchun shuncha masofa bosib keyin yana ortga qaytish bir qancha muammolarni tug'dirishi mumkin.

Biz kabi Osiyo Kubogining boshqa ishtirokchilari ham tayyorgarlikni boshlab yuborishgan. Xususan guruhdagi raqibimiz Bahrayn bugun Saudiya Arabistonida start oladigan Ko'rfaz Kubogida ishtirok etadi. Mazkur turnirda 8ta arab jamoasi qatnashadi.
"A" guruhi - Saudiya Arabistoni, Ummon, Iroq, Quvayt.
"B" guruhi - BAA, Bahrayn, Qatar, Yaman.

Bahrayn terma jamoasi ertaga, 24 sentyabr kuni Qatar bilan bellashadi, 27 sentyabr kuni BAA bilan kuch sinashsa, 30 sentyabrda Yamanga qarshi bahs olib boradi.

Guruhdagi yana bir raqibimiz Iordaniya terma jamoasi 27 sentyabr kuni Suriya hamda 6 oktyabr kuni Venesuela terma jamoasi bilan kuch sinashadi.

Guruhdagi o'ta sirli raqibimiz KXDR (SHimoliy Koreya) terma jamoasining ushbu FIFA kunlarida nima bilan mashg'ul bo'lishi to'g'risida afsuski, hech qaerda malumot berilmagan.

X.Xoliqov