"Hech kimga zerikarli chempion kerak emas". Uoker Blaxovich - Ankalaev jangi natijasini to'g'ri deb hisoblashini aytdi

Yarim og'ir vazn toifasida braziliyalik UFC jangchisi Jonni Uoker (18-7) polshalik Yan Blaxovich (29-9-1) va rossiyalik Magomed Ankalaev (17-1-1) o'rtasidagi durang bilan yakunlangan chempionlik jangi haqida gapirdi.

"Hammasi to'g'ri yakunlandi. Bu jang juda sust kechdi. Natijadan nafaqat UFC, balki muxlislarning o'zi ham qoniqish hosil qilgandek tuyuladi. Ochkolar hisobiga g'alaba qozonadigan zerikarli chempionni hech kim xohlamaydi. Odamlar nokautlar va sabmishenlarni yoqtirishadi. Menga yigitlarning raqibini nokaut qilish uchun bor kuchlarini sarflashi yoqadi.

Bu UFC va muxlislar uchun yaxshi bo'ldi: endi Glover va Jamal chempionlik uchun kurashadi, ular nokaut bilan g'alaba qozonish uchun qo'lidan kelgan barcha ishni qiladigan jangchilar va ularning janglarini hamma ko'rishni istaydi.

Menimcha, bu toza durang bo'ldi. Jang boshida Blaxovich Ankalaevning oyog'ini "zo'riqtirgan"  bo'lsa, oxiriga kelib Ankalaev ustunlikka ega bo'ldi. U oxirgi raundni raqibining ustiga o'tirib tugatdi, ammo qolganlarida unchalik ustunlik qilmadi, shuning uchun hakamlar durang natijani elon qilib, to'g'ri qaror qilishdi, deb o'ylayman.

Agar Ankalaev jangni yakunlamoqchi bo'lganida, oxirida biroz "temp"ni ko'targan bo'lardi. Masala hakamlarga etib bordi, shuning uchun shikoyat qiladigan hech narsa yo'q, faqat ularning qarorini qabul qilish qoladi", - deya Uokerning so'zlarini keltiradi Ag. Fight nashri.

Magomed Ankalaev (17-1-1) va Yan Blaxovich (29-9-1) ishtirokida 11 dekabr kuni Las-Vegas (AQSH)da tashkillashtirilgan UFC 282 musobaqasining markaziy, chempionlik jangi hakamlarning qaroridan so'ng durang bilan yakunlangan edi. Endilikda yarimog'ir vazn toifasida vakant qolayotgan chempionlik kamari uchun mazkur kamarning sobiq "egasi", braziliyalik 43 yoshli Glover Teysheyra (33-8) hamda amerikalik Jamal Xill (11-1-1) jang qiladi. Mazkur jang 2023 yilning 21 yanvar kuni Braziliyaning Rio de Janeyro shahrida tashkillashtiralayotgan UFC 283 musobaqasi doirasida markaziy qarama-qarshilik sifatida o'tkaziladi.