Joel Dias: "Ruslan Abdullaev kelasi yildayoq jahon chempioni bo'lishi mumkin"

Bu fikrni turli davrlarda beshta jahon chempioni bilan ishlagan mashhur murabbiy, bir necha yildan beri Kaliforniyadagi bokschilarimizga ustozlik qilib kelayotgan Joel Dias bildirgan.

"Bunday yigitlar boksda har o'n yilda bir marta paydo bo'ladi, - dedi Dias Abdullaev haqida The Ring nashriga bergan intervyusida. - "Golden Boy" promouterlik kompaniyasi Ruslanni kelajagi porloq bokschi sifatida ko'rayotgani juda yaxshi. Professionallar safida tajribasi kam bo'lishiga qaramay, u allaqachon kuchli raqiblar bilan to'qnash kelmoqda. Bu esa promouterlarning unga ishonishi va katta rejalari borligidan dalolatdir. Ruslan timsolida katta salohiyatni ko'ryapman. U texnikasi juda yuqori, ko'p qirrali jangchi. Uning kuchli zarbasi bor, hujum va himoyada mahorati ham yuqori. Abdullaev jismonan kuchli, chaqqon va aqlli. U kelasi yili oltita jang o'tkazib, chempion bo'lishi aniq - u allaqachon shu darajaga etgan".

Kelasi oyda 23 yoshni qarshilaydigan Ruslan Abdullaev 2023 yilda -63,5 kg vazn toifasida jahon chempionatining oltin medaliga sazovor bo'lgan. U professional ringdagi debyutini shu yilning mart oyida o'tkazib, ikkinchi raundda Xose Alvarado (3-19-1, 2KO)ni nokautga uchratgandi. Ushbu mag'lubiyat Alvarado faoliyatidagi ilk muddatidan oldingi mag'lubiyat bo'lgan edi.

Ruslan Abdullaev professional boksdagi ikkinchi jangida Jino Rodrigo (13-4-2, 11KO)ni bir ovozdan (barcha hakamlik yozuvlarida 80-71) mag'lub etgan bo'lsa, uchinchi jangida Kevin Jonson (12-7, 8KO)dan ham hakamlarning yakdil qarori bilan (80-72, 79-73, 79-73) ustun kelgandi.