Markaziy Osiyo davlatlarining medallar jamg'arish reytingidagi o'rni qanday?

O'zbekiston kunni 1 ta oltin, 4 ta kumush, 1 ta bronza medali bilan yakunladi. 

To'rt kunlik natija bo'yicha bizning sportchilar 6 ta oltin, 10 ta kumush, 12 ta bronza medalini naqd qilib, medallar jamg'arish reytingida 4-o'rinda bormoqda. O'zbekiston Osiyo o'yinlariga 390 nafar sportchi bilan yo'l olgan.

Xo'sh, medallar jamg'arish bo'yicha mintaqamiz delegaciyalarining ahvoli qanday?

Jonajon qo'shnimiz, Osiyo o'yinlaridagi raqobatli kunlarimiz hali oldinda bo'lgan Qozog'istondan boshlaymiz. Qozoq «baur»larimiz biroz g'azabda. Negaki, ular o'zlarining ilk oltin medallarini musobaqaning 3-kuniga kelibgina qo'lgan kiritishdi. Undan tashqari, o'zlarining asosiy raqobatchisi deb hisoblaydigan O'zbekiston ketma-ket medallarni olayotgani, reytingda yuqori o'rinlarni egallab turgani qozoq sport ihlosmandlari tomonidan ijtimoiy tarmoqlarda rezonansga aylandi.

524 nafar atlet bilan musobaqalarda ishtirok etayotgan qozog'istonliklar 1 ta oltin, 2 ta kumush, 10 ta bronza medali bilan medallar jamg'arish reytingida 12-o'rinni egallab turibdi.

Tojikiston. 105 nafar atlet bilan Osiyo o'yinlarida ishtirok etayotgan tojikistonliklar hozircha 1 ta oltin, 1 ta kumush, 1 ta bronza bilan reytingning 15-o'rnini band qilmoqda. Har uchala medal ham Tojikiston dzyudo federaciyasining erkaklar terma jamoasi tomonidan qo'lgan kiritilgan.

Qirg'iziston medallar jamg'arish reytingida 16-pog'onada turibdi. Hozircha ularning hisobida 1 ta oltin, 2 ta bronza medali mavjud. Oltin medal dzyudochi Erlan SHehov(-90 kg) tomonidan qo'lga kiritilgan bo'lsa, bronzalarni ushuchilar taqdim etishdi. Malumot uchun Qirg'iziston delegaciyasi uzoq kutilgan Osiyo o'yinlariga 160 nafar sportchi bilan yo'l olgan.

Xitoyga 105 nafar sportchi bilan borgan Afg'oniston delegaciyasining 3 ta bronza medali bor. Medallardan biri ayollar o'rtasidagi taekvondo bahslarida qo'lga kiritilgan. 2 ta bronza esa ushu sport turidan olingan. Ushbu natija afg'onlarni 28-o'rinda ushlab turibdi.

Turkmanistonda vaziyat ancha qiyin. Ularda bitta bronza medal bor va medallar jamg'arish reytingida 29-pog'onada. Turkmaniston sportchilar delegaciyasi 57 nafar atletdan iborat. Yagona bo'lib turgan medalga ayollar o'rtasidagi dzyudo bellashuvlarida erishilgan.