Mashaqqatdan topilgan ezoz FOTO

Toshkent viloyati Zangiota tumanidagi bolalar va o'smirlar sport maktabining ustoz-murabbiylari ham tuman yoshlarini sportga oshno etish yo'lida jonkuyar. BO'SMda  sportning karate, futbol, erkin kurash, stol tennisi badiiy gimnastika, engil atletika, bel olish kurashi, turon, qo'l to'pi, boks, suzish, og'ir atletika, basketbol, dzyudo, taekvondo, o'zbek jang sanati turlari bo'yicha 2284 nafar o'g'il-qizlar muntazam to'garaklarga qatnashadi. 

Mashg'ulotlarda toblanib, irodasi kun-sayin mustahkam bo'layotgan BO'SM tarbiyalanuvchilari mamlakat va xalqaro miqyosdagi musobaqalarda sovrindorlar safidan munosib o'rin olib, shoda-shoda medallar bilan qaytayotgani sport maktabining tajribali murabbiylaridan iborat jamoaning mehnatsevarligidan, o'z kasbining fidoiylari ekanligidan dalolat. 

Mazkur BO'SM direktori Komiljon Odilovni ko'pchilik sport mutaxassislari yaxshi taniydi. Kamtar inson, lekin sport uning hayoti. Har kuni murabbiylarning sport mashg'ulotlarini kuzatishdan, ularga kerakli maslahatlarni berishdan charchamaydi. 

Karate sport turi bo'yicha murabbiylik faoliyatida o'nlab shogirdlari jahon va osiyo chempionatlarida kuchlilar qatoridan joy olishga muvaffaq bo'lgan. U bir necha bor O'zbekiston chempioniligini qo'lga kiritgan, milliy terma jamoa safida Osiyo chempionatida birinchi o'ringa ham ega bo'lgan. 4-DAN qora belbog' sohibi sanaladi. 2010 yildan bo'yon ushbu BO'SMga rahbarlik qilib keladi.

Komiljon Odilov uchun 5 oktyar quvonchli kun bo'ldi. Boisi, shu kuni tumandagi aholi madaniyat va dam olish markazida, murabbiylar, ota-onalar va keng jamoatchilik ishtirokida O'zbekiston Respublikasi jismoniy tarbiya va sport vazirligi tomonidan  “Jismoniy tarbiya va sport alochisi” ko'krak nishoni bilantaqdirlandi. Uni  Toshkent viloyati jismoniy tarbiya va sport boshqarmasi boshlig'i O'tkir Abdullaev tantanali tarzda topshirdi. Ko'p yillik mashaqqatli mehnat mahsulidan munosib etirofga sazovor bo'lgan Komiljon Odilovga biz ham -mukofot muborak bo'lsin, deymiz. 

- Etirof uchun O'zbekisiton jismoniy tarbiya va sport vazirligiga, sport mutaxassislariga, ustoz-murabbiylarga tashakkur aytaman, - dedi Komiljon Odilov. - Bu ko'krak nishoni birgina meniki emas, balki butun bir jamoamizniki, deb hisoblayman. Berilgan mukofot bizga yanada masuliyat yuklaydi. Farzandlarimizni sport bilan hamnafas bo'lishida, jismoniy tarbiyani yanada aholi orasida keng ommalashishida, yosh iqtidor egalarini erta aniqlab, katta sport sari yo'naltirish yo'lida bor bilim va tajribamizni ishga solishda davom etamiz.

Ilhom RAHMONOV tayyorladi, o'z muxbirimiz