Murodjon Ahmadaliev Toshkentga qaytib keldi

Murodjon Ahmadaliev 25 iyun kuni WBA kamarini Roni Riosdan muvaffaqiyatli himoya qildi. Bugun bokschimiz Toshkentga qaytib keldi. KAKA tantanali tarzda kutib olindi hamda OAV vakillarining savollariga javob berdi:

"Ikkinchi raundda qo'limdan jarohat oldim, ring tashqarisida murabbiylar, do'stlarim ishlashim kerakligini qayta-qayta takrorlashyapti. Lekin o'zimdan o'tayotganini o'zim bilaman. Qo'limni og'rig'i miyamga chiqib ketyapti. Og'riq bilan murabbiyni ko'rsatuvini qabul qilish juda qiyin. Zarba berishga berasiz, lekin keyingi raundlarga qo'lingiz bardosh bermaydi. Oxirgi raundda tavakkal qildim, chuni ortga yo'l yo'q edi. Jarohatga qaramay oldinga harakat qildim va g'alaba qozondim.

Bitta jangga 3-4 oylab tayyorgalik ko'ramiz, dieta qilamiz. Bitta jarohat uchun shuncha tayyorgarlikni nega yo'qqa chiqarishim kerak? Nima bo'lishidan qati nazar, mehnatga yarasha o'zingizni ko'rsatishingiz kerak. 

Ringni ichida bo'layotganlarni bokschini o'zi yaxshi his qiladi. Men murabbiylarni ko'rsatmasini bajarishga harakat qilmoqchiman, biroq tavakkal qilsam keyingi raundlarda qanday ishlayman degan qo'rquv ham bo'ldi. Lekin nima bo'lsa bo'ldi, qo'lim sinib ketsa ham oxirigacha tushaman dedim. 

Bu jangni faoliyatimdagi eng qiyini deyishim mumkin.

Burchagimdagilar raundlar oralig'ida birdaniga 3 xil tilda ko'rsatma berishdi...

U vaqtda aytmoqchi edim, to'xtanglar, bitta-bitta gapiringlar, deb. Ichimdan nima o'tayotganini bilyapman, navbat bilan gapiringlar, hammasi yaxshi ketyapti, demoqchi edim... Hamma gapiryapti, qo'limni og'rig'i miyamga etib kelyapti. Bunday holatda atrofdagi gaplarni qabul qilish ham qiyin. CHunki sportchini o'zi biladi, nima ko'proq to'g'ri ekanligini. 

Fultonning chorloviga qanday munosabatdaman?

-Promouter, menejerlarimiz bu masalada muzokoralar olib borishadi. Katta ehtimol bilan keyingi jangim Fultonga qarshi bo'ladi"