26 noy 20:08
Yangiliklar

Suv sporti turlari

Navoiylik sportchilar O'zbekiston kubogi sohibi bo'ldilar + FOTO

Teglar : Suzish Navoiy

Poytaxtimizdagi Respublika olimpiya zaxiralari kollejida suzish bo'yicha o'tkazilgan mamlakat kubogi bahslari yakuniga etdi.

Musobaqaning beshinchi kuni ishtirokchilar 50 metr masofaga chalqancha, 100 metrga batterflyay, 200 metrga brass, 400 metr masofaga erkin va 4x100 metr masofaga estafeta bahslarida sovrinli o'rinlar uchun kurash olib bordilar.

SHu o'rinda takidlash joizki, mamlakat kubogi bahslarining so'nggi kuni kutilganidek murosasiz kurashlarga boy tarzda kechdi.

Qizg'in kechgan bahslarning yakunlariga ko'ra 50 metr masofaga chalqancha usulda suzish bo'yicha erkaklar orasida qoraqalpog'istonlik Adilbek Yusupbaev birinchi o'rinni egalladi. Ikkinchi o'rinni Andijon viloyati vakili Mahmudshox Qodirov band etgan bo'lsa, kuchli uchlikka sirdaryolik Mixail Kleshko yakun yasadi.

Xuddi shu yo'nalishda ayollar o'rtasida kechgan bahslarda Navoiy viloyati vakili Alyona Vasileva marraga birinchi bo'lib etib keldi.

SHundan so'ng 100 metr masofaga batterflyay usulida suzish bo'yicha musobaqalar o'tkazildi. Ushbu musobaqada erkaklar orasida andijonlik Eldorbek Usmonov, xotin-qizlar o'rtasida esa Anastasiya Zelinskaya oltin medal bilan taqdirlanishdi.

200 metr masofaga brass usulida suzish bo'yicha erkaklar o'rtasida g'oliblikka Respublika oliy sport mahorati maktabi tarbiyalanuvchisi Roman Berkovich sazovor bo'ldi. Andijonlik Timur Yazikov ikkinchi, Toshkent shahri vakili Emir Aliev uchinchi o'rinni band etdi.

400 metr masofaga kompleks usulda suzishda erkaklar orasida Respublika oliy sport mahorati maktabi tarbiyalanuvchisi Egor Petryakov shoxsupaning eng yuqori pog'onasiga ko'tarildi.

4x100 metr masofaga erkin usulda estafeta bahslarida Navoiy viloyati vakillari birinchi o'rinni egallashdi. Respublika olimpiya zaxiralari kolleji jamoasi ikkinchi, Toshkent shahri vakillari uchinchi o'rinni band etishdi.

SHu tariqa besh kun davom etgan musobaqa yakunlariga ko'ra umumjamoa hisobida birinchi o'rinni egallagan Navoiy viloyati vakillari O'zbekiston kubogi sohibi bo'ldilar. Toshkent shahri jamoasi ikkinchi, Respublika oliy sport mahorati maktabi tarbiyalanuvchilari esa uchinchi o'rinni egallashdi.