Nigora Tursunqulova: “Vada berib qo'yish meni tabiatimga yot narsa”

Terma jamoaga nomzod qizlarimiz Turkiyada, yigitlar esa Yangiobod o'quv-mashg'ulot bazasida o'z yig'inlarini o'tkazishyapti. Biz terma jamoaning tajribali azolaridan biri Nigora Tursunqulova bilan suhbatlashdik. 

– Mana, o'quv-yig'in mashg'ulotlarimizda ko'rib turganingizdek Tokio olimpiadasiga tayyorgarlik olib borish uchun yangi murabbiy jalb etildi. Va ushbu murabbiy bilan mashqlarni boshlab yubordik. Tayyorgarliklarning hammasi yaxshi ketyapti. Oldinda Olimpiadaga yo'llanma beruvchi to'rtta “G-Seria” musobaqalari bor. Mazkur musobaqalarda yaxshi natijalar ko'rsatib, nasib qilsa, olimpiya o'yinlari uchun licenziyalarni qo'lga kiritamiz. Seriya turkumlaridan o'ta olmagan sportchilar uchun yakuniy musobaqa Xitoyda o'tkaziladi va bu Olimpiadada ishtirok etish uchun yo'llanma taqdim etuvchi oxirgi turnir sanaladi. Men ham 2016 yilda Rio olimpiadasiga taqdim qilinadigan yo'llanmani aynan shu musobaqada finalgacha etib borgan holda qo'lga kiritganman.

– Manchesterdagi muvaffaqiyatsizliklarni terma jamoadagi tajribali sportchi sifatida qanday baholaysiz?

– Bilasizmi, hamma musobaqaga g'alaba qozonish uchun tashrif buyuradi. Ana shu turnir uchun qiyinchiliklar, og'ir mashg'ulotlarni boshdan kechiradi. Ammo bu – sport. Qancha tirishmang, harakat qilmang baribir Xudo taqdiringizga yozgani bo'ladi.

Biz hozirda juda malakali murabbiy qo'lostida mashg'ulotlarni olib boryapmiz. Bu erda hamma professional sportchi hisoblanadi. Ularda murabbiy yaxshi taassurot qoldirmoqda. Demak, biz yomon murabbiy bilan emas, yaxshi hamda tajribali murabbiy bilan mashg'ulotlarni o'tkazmoqdamiz.

– Olimpiada o'yinlarida o'zingizga qanday maqsad qo'ygansiz?

– To'g'risi, oldindan biron narsani vada berib qo'yish meni tabiatimga yot narsa. Albatta, chempion bo'lishni, yurtimiz dovrug'ini jahonga tanitishni istayman. Ammo undan avval Olimpiada yo'llanmasini qo'lga kiritishni maqsad qilganman. Keyin esa Tokiodagi musobaqalar haqida biron narsa deyishim mumkin.