Novak Jokovich 36 yoshda!

Novak Jokovich 1987 yilning 22 mayida Belgradda (Serbiya) tug'ilgan. To'rt yoshidan tennis bilan shug'ullana boshlagan. U professional faoliyatini 2003 yilda boshlagan. O'zining chiqishlari davomida u 93 ta ATR turnirida g'olib chiqqan, shu bilan birga 167 296 242 AQSH dollari miqdorida mukofot puli ishlab topgan. 

Novak hozirgacha 22 ta “Katta Dubulg'a“ turnirida zafar quchgan: Australian Open (2008, 2011, 2013, 2015, 2016, 2019, 2020, 2021 va 2023), Uimbldon (2011, 2014, 2015, 2018, 2019, 2021, 2022), US Open (2011, 2015 va 2018) va "Rolan Garros" (2016, 2021). Novak yana 11 marta "Katta Dubulg'a" turnirlari finalida o'ynagan. SHuningdek, serbiyalik sportchi ATR Yakuniy turnirida olti bor g'alabaga erishgan.

2011 yilning iyul oyida Jokovich o'z faoliyatida ilk bor sayyoramizning birinchi raketkasiga aylangandi.

Jokovich muntazam ravishda turli xalqaro turnirlarda Serbiya bayrog'ini himoya qilib keladi. 2010 yilda terma jamoa tarkibida u "Devis Kubogi"ni qo'lga kiritdi. SHuningdek, 2020 yilda  ATP Cup'da zafar quchdi. 2008 yilgi Pekin Olimpiadasi yakkalik bahslarida bronza medaliga sazovor bo'ldi.

2014 yilda Novak Elena Ristichga uylandi. O'sha yilning oktyabr oyida taniqli sportchining oilasida birinchi farzand dunyoga keldi. Jokovich farzandiga Stefan deya ism qo'ydi. 2017 yilda ularning ikkinchi farzandi tug'ildi. Unga Tara ismini qo'yishdi. 

Ayni paytda Jokovich jahonning uchinchi raketkasi bo'lib turibdi. U reytingni 387 hafta davomida boshqargan va bu ko'rsatkich bo'yicha shveycariyalik Rojer Federer (310 hafta) hamda Steffi Grafning (377 hafta) umumiy rekordini ortda qoldirdi.