Odiljon Aslonov o'z g'alabasi bilan "Kama"ga bosh sovrinni taqdim etdi FOTOGALEREYA

Finalda "Kama" va "Leningrad" jamoalari o'zaro to'qnash keldi. Turnir professional boks formatida beshta vazn toifasida (-58, -65, -73, -80 va 86 kg) o'tkazildi. Barcha janglar to'rt raund etib belgilangandi.

Biz uchun etiborlisi, hamyurtimiz Odiljon Aslonov (5-0-1) finalda jang qilgan "Kama" jamoasi tarkibida rossiyalik Dmitriy Karmanovga qarshi ringga ko'tarildi va raqibini ochkolar hisobiga ko'ra mag'lubiyatga uchratdi. To'rt raunddan faqat bittasida Karmanov ustunlikka erishgan.

SHu tariqa, final bahsida "Kama" jamoasi "Leningrad" bokschilari ustidan umumiy 3:2 hisobida ustun kelib, bosh sovrinni qo'lga kiritishdi. Aslanovning g'alabasi jamoasining umumiy muvaffaqiyatiga zamin yaratgan. "Kama" ikkinchi bor "G'alaba Kubogi"da zafar quchdi. O'tgan yilgi finalda ham "Kama" aynan "Leningrad" jamoasini xuddi shu hisobda taslim etgan edi.  

Uchinchi o'rin uchun kechgan qarama-qarshilikda esa "Moskva" jamoasi "Kavkaz" bokschilaridan 3:2 hisobida ustun kelishdi. "Moskva" o'tgan yili ham uchinchi o'rinni egallagandi. 

"G'alaba Kubogi"ning mukofot jamg'armasi 7,5 million rublni tashkil qiladi. G'alaba qozongan jamoa uch million, ikkinchi o'rin egasi ikki, uchinchi o'rin sohibi esa bir million rubl pul mukofotini qo'lga kiritdi. Bokschilar bugungi o'z g'alabalari uchun 30 ming rubldan pul mukofotiga ham ega bo'lishdi.