Qozog'iston haqiqatdan ham Boltaev - Konsbekov jangi yuzasidan shikoyat qildimi?

Musobaqa doirasida -75 kg vazn toifasida yurtimiz sharafini himoya qilayotgan SHavkatjon Boltaev bir necha kun oldin o'zbek boksi tarbiyalanuvchisi, bugungi kunda Qozog'iston terma jamoasi nomidan musobaqalarda ishtirok etayotgan Aman Konsbekovni 4:1 hisobida mag'lub etgandi.

Qozog'iston tomon ushbu jang natijasidan norozi bo'lgani va bu borada shikoyat kiritishi haqida xabarlar tarqalgandi. 

Biz ushbu masala yuzasidan O'zbekiston boks federaciyasiga murojaat qildik. Federaciya bosh kotibi SHohid Tillaboev esa ushbu vaziyat borasida munosabat bildirdi.

"Bu musobaqa World Boxing konstituciyasi va texnik qoidalari asosida o'tkaziladi. Musobaqa reglamentiga ko'ra, jang natijalari bekor qilinmaydi va qayta ko'rib chiqilmaydi. 

Bu jangda muxlislar g'alaba qozondi degan bo'lardim. Bahsda o'zbek boksining ikki ajoyib tarbiyalanuvchisi o'rtasidagi jangni tomosha qildik. Bu jangni finaldan oldingi final degan bo'lardim. Aman Konsbekov ham o'zbek boksi tarbiyalanuvchisi. U Qozog'iston terma jamoasi safiga borib qo'shilganiga ko'p vaqt bo'lgani yo'q. U bilan munosabatlarimiz yaxshi. 

Qo'shimcha sifatida aytishim mumkinki, yigitlarning har ikkisi ham o'zbek boksi maktabi tarbiyalanuvchilari ekanligini inobatga olsak, bu O'zbekiston boksining qanday darajada ekanligini ko'rsatib berdi. Ularning ikkisi ham do'st, birgalikda ulg'ayishgan. SHuning uchun, bu mavzuda qandaydir "negativ" fikrlar bildirilmasligini istardim" - dedi SHohid Tillaboev saytimiz jurnalisti Aziz To'xtamurodov bilan suhbatda.