Ravshan Xodjaev: "Odiljon Aslonov jangga tayyor!"

SHu munosabat bilan sportchimizning ustozlaridan biri Ravshan Xodjaevdan bo'lajak raqib va tayyorgarlik jarayonlari xususida so'radik.

"Odiljonning prof boksdagi raqibi haqida gapirsam, Nikita Zon rossiyalik bokschi, hali prof boksda mag'lubiyatga uchramagan, 4 ta jangda 4 ta g'alaba, shundan 3 tasida nokaut orqali zafar quchgan. Ishonamanki, shogirdimiz bu bokschini mag'lub eta oladi. Yana bir malumot, agarda Odiljon Aslonov raqibini engga olsa, reytingda 150 nafar bokschilar orasiga kirib oladi.

Biz rossiyalik bokschining janglarini kuzatdik, asosan zarbalarini chap qo'lda yo'llar ekan. Bu kabi chapaqay sportchilar doim noqulaylik tug'diradi. Ammo, biz barchasiga tayyormiz va raqibga qarab taktika qo'yamiz.

Yaqindagina Rossiyada bo'lib o'tgan professional bokschilar o'rtasidagi "Qitalar kubogi" turnirida Odiljon Aslonov ham ishtirok etdi. Bu musobaqa biz uchun bo'lajak jang oldidan tayyorgarlik jarayonini o'tab berdi. 

Moskvadan qaytganimizdan so'ng bir oz hordiq chiqardik, so'ngra Odiljon Toshkent viloyati tog' yon bag'rlarida joylashgan "Yangiobod" o'quv-mashg'ulot bazasida hamkasbim, ko'plab chempion bokschilar ustozi, qolaversa, Aslonovning ham murabbiyi Hamza Avezov qo'l ostida shug'ullandi va jismoniy holatni tiklovchi mashqlarga etibor qaratishdi.

Hozirda jang oldi tayyorgarlikning so'nggi bosqichini shahrimizdagi Olimpiya va Paralimpiya zaxiralari kolleji boks zalida olib boryapmiz. Aniq ayta olamanki, Odiljon 100 % jangga tayyor".

Maqsud Komilov yozib oldi, O'zbekiston boks federaciyasi Buxoro viloyat bo'limi matbuot xizmati