Rayan Garsiya - Konor Benn jangida nokaut qayd etildi

Oqshomning asosiy jangida yarim o'rta vazn toifasida WBC chempioni Rayan Garsiya  britaniyalik davogar Konor Bennga qarshi ringga ko'tarildi va raqibini ikkinchi raunddayoq texnik nokaut evaziga mag'lub etdi.

Har ikki raqib jangni faol boshladi. Garsiya qarshi hujumlarda harakat qilgan bo'lsa, Benn yaqin masofaga kirib, zarbalar yo'lladi. Ikkinchi raundda Garsiyaning o'ng qo'l bilan yo'llagan aniq qarshi zarbasi britaniyalik raqibini nokdaun holatiga tushirdi. Garsiya kanat yaqinida raqibini yakson qilishga kirishdi va garchi boshqa nokdaunlar bo'lmasa-da, Benn zo'rg'a tik turganligi sababli hakam jangni to'xtatdi.

G'alabadan so'ng Garsiya WBA chempioni Teofimo Lopesni jangga chorladi. Lopes ringga chiqishga urindi, biroq qo'riqchilar uni nima uchundir kiritishmadi. Bungacha qo'riqchilar Devid Benavidesni ham to'xtatib qolishgan, biroq keyinroq uni Jey Opetayaning oldiga ringga o'tkazib yuborishgandi. Kiyinish xonasiga ketayotib, Garsiya DAZN telekanaliga bergan intervyusida zaldagi Terens Kroufordning yonida o'tirgan WBO chempioni Devin Xeyni bilan emas, aynan Lopes bilan jang qilishga qiziqayotganini yana bir bor tasdiqladi.

Benn hakamning qaroriga etiroz bildirmadi. Ushbu jang oldidan Benn bu uning yarim o'rta vazndagi so'nggi jangi ekanligini malum qilgandi. Bu yaqqol ko'rinib turgan edi, chunki tarozidan o'tgandan so'ng Benn vaznini deyarli 80 kg ga ko'targandi. Uning so'zlariga ko'ra, u birinchi o'rta vazn toifasini o'tkazib yuborib, o'rta vazn toifasida jang qilish niyatida.