Saidjamshid Jafarov O'zbekiston chempionatidan so'ng Dubaydagi "IBA Champions Night" oqshomida jang qiladi, raqib - Jahon chempioni

Musobaqaning markaziy jangida rossiyalik Olimpiada chempioni Albert Batirgaziev uch karra Jahon chempioni, Kuba vakili Lazaro Alvares bilan to'qnash keladi. 10 raundlik jang engil vazn toifasidagi chempionlik kamari uchun o'tkaziladi.

Etiborlisi, ushbu musobaqa doirasida o'rta vazn toifasida o'zbekistonlik bokschi Saidjamshid Jafarov ham ringga ko'tariladi. Hamyurtimizga o'sha kuni yaponiyalik Jahon chempioni hamda Xanchjou-2022 Osiyo o'yinlari g'olibi Sevon Okazava raqiblik qiladi.

Qizig'i, Saidjamshid BAAda tashkil etilgan o'tgan yilgi "CHempionlar oqshomi"da ham jang qilgan edi. Jafarov bilan birgalikda o'sha musobaqada yana bir bokschimiz Bahodir Jalolov ham ringga chiqib, g'alaba qozongan edi.

Malumot o'rnida, Saidjamshid Jafarov shu kunlarda Toshkentda davom etayotgan O'zbekiston chempionatida ishtirok etmoqda. U kecha ilk jangini Manguberdi Abdurasulovga qarshi o'tkazib, hakamlarning yakdil qarori bilan g'alaba qozongan edi.