Sakkiz nafar dzyudochimiz “Rio-2016” Olimpiada o'yinlariga yo'llanma oldi

Quvonarlisi, Olimpiada o'yinlarining yo'llanmasi uchun reyting ochkolari o'ynalgan musobaqalar yakunlariga ko'ra O'zbekiston terma jamoasi sakkizta yo'llanmaga ega bo'ldi.

Unga ko'ra, erkaklar terma jamoamiz barcha ettita (-60, -66, -73, -81, -90, -100, +100 kg) vaznda yo'llanmaga ega bo'lishgan bo'lsa, ayollar terma jamoamizdan Gulnoza Maniyozova (-70 kg) qitaviy kvota orqali Olimpiada o'yinlarida qatnashish xuquqiga ega bo'lgan.

Malumki, Olimpiada o'yinlarining yo'llanmasi uchun reyting ochkolari o'ynalgan musobaqalar yakunlariga ko'ra erkaklar o'rtasida har bir vazn toifasida kuchli 22talikdan, xotin-qizlar orasida esa kuchli 14talikdan o'rin olgan sportchilar “Rio-2016” o'yinlariga yo'llanma oladilar. Qoidaga ko'ra, har bir vazn toifasida bir davlatdan faqatgina bir nafar sportchi yo'llanmaga ega bo'ladi. Bundan tashqari, qitaviy kvotalar orqali ham sportchilarga Olimpiada o'yinlarining yo'llanmalari beriladi.

Erkaklar terma jamoamizning ikki nafardan sportchisi -60 kg. va -81 kg vazn toifalarida kuchli 22talikdan o'rin egallashgan. Bular Diyorbek O'rozboev (-60 kg), SHarofiddin Lutfullaev (-60 kg), SHahzodbek Sobirov (-81 kg) va Yahyo Imomov (-81 kg). Ularning qay birini XXXI yozgi Olimpiada o'yinlariga yo'l olishi O'zbekiston dzyudo federaciyasi tomonidan elon qilinadi.

Qolgan vazn toifalarida Rishod Sobirov (-66 kg), Mirali SHaripov (-73 kg), SHerali Jo'raev (-90 kg), Soib Qurbonov (-100 kg) va Abdullo Tangriev (+100 kg) kuchli 22talikdan o'rin egallab, Olimpiada o'yinlarining yo'llanmasiga ega bo'ldilar.

Hamyurtlarimizdan Abdullo Tangriev 2008 yili Pekin (Xitoy)da bo'lib o'tgan Olimpiada o'yinlarida kumush medalga sazovor bo'lgan bo'lsa, Rishod Sobirov 2008 yilgi Pekin hamda 2012 yilgi London (Buyuk Britaniya)da o'tkazilgan Olimpiada o'yinlarida bronza medallari bilan taqdirlangan.

Diyorbek O'rozboev (-60 kg), SHarofiddin Lutfullaev (-60 kg), SHahzodbek Sobirov (-81 kg), SHerali Jo'raev (-90 kg), Soib Qurbonov (-100 kg) va Gulnoza Maniyozova (-70 kg) shu paytga qadar Olimpiada o'yinlarida ishtirok etishmagan.

Mirali SHaripov 2008 yili Pekin shahrida bo'lib o'tgan Olimpiada o'yinlarida vazni 66 kg.gacha bo'lgan polvonlar musobaqasida 5-o'rinni egallagan. Yahyo Imomov esa London-2012 o'yinlarida (-81 kg.vaznda) 17-o'rinni band etgan.

Eslatib o'tamiz, XXXI yozgi Olimpiada o'yinlari dasturidan o'rin olgan dzyudo kurashi bo'yicha musobaqalar 6-12 avgust kunlari o'tkaziladi.


SHavkat Jalilov