SHveycariyada qishki o'smirlar Olimpiadasi boshlanmoqda. Unda o'zbekistonlik sportchi ham ishtirok etadi

Uchinchi bor o'tkazilayotgan mazkur Olimpiya o'yinlarida 70 mamlakatdan tashrif buyuradigan 15-18 yosh oralig'idagi qishki sport turlarining bo'lajak yulduzlari ishtirok etishadi. Bu galgi musobaqada biatlon, chang'i poygasi, xokkey, tog' chang'isi, figurali uchish, chang'i ikki kurashi, short-trek kabi 16 sport turida 81 komplekt medallar jamlanmasi o'z egalariga topshiriladi. 

Lozanna-2020 Olimpiadasining ochilish marosimi suv sporti turlari, qilichbozlik va stol tennisi bo'yicha bazalarni ham o'z ichiga olgan yangi “Malley” muz arenasida bo'lib o'tadi. Ushbu arena zamonaviy jihozlangan asosiy, mashg'ulot va ochiq muz maydonlariga ham ega.

Musobadaqa Valeriya Kovalyova tog' chang'isi bo'yicha yurtimiz sharafini himoya qiladi. Takidlash joiz, ushbu yosh sportchimiz 10-15 yanvar kunlari slalom, gigant-slalom, super-gigant va Alp kombinaciyasi yo'nalishlari bo'yicha ishtirok etishi belgilangan. Hamyurtimiz ungacha tajribali murabbiy Andrey Voronov qo'l ostida hozirlik ko'radi.

O'smirlar qishki Olimpiadasida ishtirok etayotgan yurtdoshimizni qo'llab-quvvatlash uchun O'zbekiston delegaciyasi ham Lozannaga tashrif buyurdi. O'zbekiston Milliy olimpiya qo'mitasi bo'lajak musobaqada sportchimizga omad va zafarlar tilab qoladi.

Malumot uchun, Lozanna shahri rasman Olimpiya poytaxti deb ham yuritiladi. Zero, Xalqaro Olimpiya qo'mitasi, shuningdek, bir qator xalqaro sport federaciyalarining shtab-kvartirasi aynan ushbu shaharda joylashgan.