Superbet Poland Rapid & Blitz. Nodirbek Abdusattorov Magnus Karselnni mag'lub etdi (Jadval + FOTO)

Mukofot jamg'armasi 175 000 AQSH dollarini tashkil etuvchi ushbu musobaqada dunyoning kuchli 10 nafar grossmeysteri bosh sovrin uchun bahslarga kirishgandi. Ikki kun davom etgan rapid turnirida xitoylik Vey I 13 ochko bilan g'oliblikni qo'lga kiritgandi. O'nta turda mag'lubiyatga uchramagan Magnus Karlsen 12 ochko bilan ikkinchi o'rinni egallagandi. 

Dunyo reytingida 5-o'rinni egallab turgan hamyurtimiz Nodirbek Abdusattorov esa 8 ochko jamg'arib, hindistonlik Erigaysi bilan 6-7 o'rinlarni bo'lishib olgan edi. Kecha esa turnirda blic bahslari start oldi. Blicning birinchi kuni grossmeysterlar 9 ta turda dona surishdi. 

Etiborlisi, Nodirbek blicning 3-turida qora donalarda o'ynashiga qaramay, jahon chempioni Magnus Karlsenni mag'lub etishga muvaffaq bo'ldi. Abdusattorov Karlsenga ikkita mag'lubiyatidan birini taqdim etdi. Hamyurtimiz 9 ta turda 3 ta g'alaba, 3 ta durang va 3 mag'lubiyat qayd etdi. U 4,5 ochko bilan qo'shimcha ko'rsatkichlarga ko'ra 4-o'rinni egallab turibdi. 

Xitoylik Vey I blicda ham mahorat ko'rsatmoqda. U 7,5 ochko bilan yakka peshqadam bo'lib olgan. Kuchli uchlikdan joy olgan Magnus Karlsen va Arjun Erigaisi hisobida 6 tadan ochko bor. Bugun blic turniri davom ettiriladi. Blicda har bir g'alabaga 1, durangga esa 0,5 ochko taqdim etiladi. Turnir g'olibi 40 000 dollarga ega bo'ladi.   

Ishtirokchilar: Magnus Karlsen (Norvegiya, rapid 2828/blic 2886), Vey I (Xitoy, 2758/2684), Yan-Kshishtof Duda (Polsha, 2748/2766), Nodirbek Abdusattorov (O'zbekiston, 2733/2661), Rameshbabu Pragnanandha (Hindiston, 2704/2675), Anish Giri (Niderlandiya, 2687/2715), Arjun Erigaysi (Hindiston, 2671/2744), Dommaradju Gukesh (Hindiston, 2649/2651), Vinsent Kaymer (Germaniya, 2647/2610), Kirill SHevchenko (Ruminiya, 2622/2546).

Rapid va blic yo'nalishlarining umumiy jadvali