Taekvondo va karate bo'yicha terma jamoamiz xorij safariga yo'l oldi

Aniqroq qilib aytadigan bo'lsak, karatechilarimiz 19-21 aprel kunlari Marokashning Rabot shahrida bo'ladigan Premer liga musobaqasiga, taekvondochilarimiz esa Angliyaning Manchester shahriga xalqaro o'quv-mashg'ulot yig'inini o'tkazish uchun safarga otlanishdi. Har ikki delegaciyamiz ham Toshkentdan Istanbulga uchadigan reysda birga parvoz qilishmoqda. Hamyurtlarimiz Turkiya poytaxtidan ikki tomonga bo'linishadi.

Rabotdagi musobaqada Sadriddin Saymatov, Sanjar Abdukarimov, Iqboljon Uzoqov, Doniyor Otabolaev, Bahriniso Boboeva hamda Barno Mirzaeva yurtimiz sharafini himoya qilishadi. Takidlash joiz, ushbu turnirda Tokio Olimpiadasi uchun qimmatli reyting ochkolari o'ynaladi.

Angliya safariga otlangan taekvondochilarimiz 28 aprelga qadar yig'in o'tkazishadi. Yig'in uchun Manchester shahri tanlanishing ham o'ziga yarasha sababi bor. 15-19 may kunlari aynan ushbu shahar navbatdagi jahon chempionatiga mezbonlik qiladi. Mazkur yig'inda jahonning etakchi terma jamoalari ham ishtirok etishi vakillarimizning musobaqadan avvalgi jismoniy holatini ko'zdan kechirib olish uchun ayni muddao. Yig'inga jalb qilingan sportchilarimiz quyidagilar: Dmitriy SHokin, Nikita Rafalovich, Nigora Tursunqulova, Feruza Sodiqova, Madinabonu Mannopova, SHuhrat Salaev, Valentin Xegay, CHaros Qayumova, Svetlana Osipova.